“ტყიბულის შახტაში არსებულ შრომის უსაფრთხოებას, შრომის საერთაშორისო ორგანიზაციიდან მოწვეულ ექსპერტებთან ერთად შევისწავლით”

საქართველოს შრომის, ჯანმრთელობისა და სოციალური დაცვის მინისტრმა, დავით სერგეენკომ სოციალური პარტნიორობის სამმხრივი კომისიის სხდომის დასრულების შემდეგ განაცხადა, რომ მხარეები შეთანხმდნენ, საერთაშორისო ორგანიზაციიდან მოიწვიონ შესაბამისი ექსპერტები, რომლებიც შეაფასებენ ტყიბულის შახტში არსებულ შრომის უსაფრთხოებას.
მინისტრი იმედოვნებს, რომ შრომის საერთაშორისო ორგანიზაციიდან, ექსპერტების ჩართვა დროულად მოხდება.
„სოციალური შეღავათების ჩამონათვალში იყო საკითხები, რომელიც საჭიროებდა სამმხრივი კომისიის წევრების გარდა სხვა ინსტიტუციების ჩართვას. ეს იყო საკითხები საპენსიო ასაკის შემცირებაზე, ასევე საგადასახადო შეღავათებზე. ჩვენ შევთანხმდით, რომ უახლოეს დღეებში სამუშაო ჯგუფში შეიქმნება ფორმატი, რომელზეც ამ სოციალური პაკეტების საკითხს განვიხილავთ. რაც შეეხება შრომის უსაფრთხოებას, მიუხედავად იმისა, რომ როგორც თავად კომპანიას, ასევე ტექნიკური ზედამხედველობის საწარმოს და სამინისტროს შრომის ინსპექტირებას რამდენჯერმე ჩატარებული აქვს გარკვეული შეფასებები, ჩვენ შევთანხდით ასეთ ფორმატზე, რომ შრომის საერთაშორისო ორგანიზაციიდან მოვიწვევთ შესაბამის ექსპერტებს, რომლებთან ერთადაც შევაფასებთ მთლიანად საწარმოში შრომის უსაფრთხოებას. დიდი იმედი მაქვს, რომ შრომის საერთაშორისო ორგანიზაციიდან ექსპერტების ჩართვა დროულად მოხდება“, – განაცხადა დავით სერგეენკომ.
მინისტრის თქმით, მნიშვნელოვანი საკითხია, რომ ტყიბულის მოსახლეობის დასაქმება მხოლოდ ერთ საწარმოზე არ იყოს დამოკიდებული. მისივე თქმით, არის მოსაზრება, რომ სხვა მიმართულებითაც შეიქმნას საწარმოები, რომელიც არ გახდის მოქალაქეებს ერთ საწარმოზე დამოკიდებულს.