3 მაისს ხაშურში მომხდარი მკვლელობის ფაქტს ჟურნალისტი დაჩი გრძელიშვილი Facebook-ზე ეხმაურება. ამ მკვლელობის დაჩისეული ვერსია სრულიად საპირისპირო სურათს ქმნის მომხდარზე, ვიდრე ის აქამდე იყო წარმოდგენილი.
„ძალიან არ მინდა ამ სიტყვების დაწერა. იმიტომ რომ ცრემლიც და სისხლიც ერთნაირად მაქვს გამშრალი. გუშინწინ ჩემი ბავშვობის მეგობარი მოკლეს – ბესო ომიაძე. სენტიმენტები მძულს. დარდიც მარტო მირჩევნია და ამ სიტყვების წასაკითხად არ მოგაცდენდით, რომ არა ერთი გარემოება – გუშინდელის მერე ბესო რამდენჯერმე მოკლეს. იმდენჯერ, რამდენჯერაც ამა თუ იმ ტელევიზიაში თუ ვებზე სიუჟეტი გავიდა. ცალმხრივად მომზადებული სიუჟეტი, სადაც მეორე მხარეს ექსკლუზიურად და ცალსახად აქვს საშუალება მიცემული, ყოველგვარი გამოძიების და ექსპერტიზის გარეშე, ბესო ომიაძეს თავდამსხმელი, მოძალადე, ნარკომანი, მკვლელი და ათასი საზიზღრობა უწოდოს. მიუხედავად იმისა, რომ ბოლო ერთი წელი ბესო ომიაძე თავის ოჯახში, თავის ოთხ შვილთან ერთად ამ სიუჟეტებში გამოსული ცილისმწმებელი ქალბატონის სამ შვილსაც ზრდიდა. მიუხედავად იმისა, რომ ბოლო ერთი წელი ბესო ომიაძის ოჯახს და მათ შვიდ შვილს ამ ქალბატონისგან სტრესის, შეურაცჰყოფის და ინტრიგების მეტი არაფერი ახსოვს. ამ მკვლელობის წინაპირობის დეტალებს აღარ განვავრცობ – არ მინდა მავანის უმსგავსობის მყრალი სუნით შეგაწუხოთ… და მე გულწრფელად არ ვიცი რა გავაკეთო – ყველა მედიას ჩამოვუარო და სათითაოდ მოვუყვე როგორ ზრდიდა ბესო ერეკლეს, თევდორეს, თეკლეს და თორნიკეს? როგორი ურთერთობა ჰქონდა მეუღლესთან? თორმეტი წლიდან დაობლებულმა, უმცროსი ძმა მარტომ როგორ გაზარდა? ან რა მოხდა მკვლელობის წინა ღამეს, ჰქონდა თუ არა წინაპირობა ბესოს ამ სოფელში ჩასვლას? ჩემო კოლეგებო – მეგობრებო, ნაცნობებო და უცნობებო… მართლა არ ვიცი რა ვქნა იმისთვის, რომ ჩემი მეგობრის მკვლელობა მისი მკვლელობის შემდეგაც უსასრულოდ არ გაგრძელდეს“, – წერს დაჩი გრძელიშვილი.
imedinews-ისთვის კი ამბის ის ნაწილი გახდა ცნობილი, რაც დაჩი გრძელიშვილმა საკუთარ სტატუსში არ დაწერა. არსებული ინფორმაციით, ბესიკ ომიაძის ყოფილმა რძალმა მკვლელობამდე ცოტა ხნით ადრე, საკუთარი სამი შვილიდან ერთ-ერთი, 8 წლის ბიჭი, ბესიკის სახლიდან თავის სახლში მამინაცვლის გასაცნობად წაიყვანა. სახლში დაბრუნებული ბავშვი 24 საათის განმავლობაში უტყვი და ურეაქციო იყო. ბოლოს ბიძას და ბიცოლას გამოუტყდა, რომ დედა და მისი ქმარი ბავშვის თვალწინ ისე იქცეოდნენ, რამაც მასზე ძალიან იმოქმედა და თან ეუბნებოდნენ – რა იყო, ხომ არ ეჭვიანობო. ამ ამბის გამგონე ბესიკ ომიაძე ყოფილ რძალთან იმის სათქმელად გაემგზავრა, რომ როცა ის შვილებთან კონტაქტს გადაწყვეტდა, ამ შეხვედრისთვის თავისი ახალი მეუღლე მოერიდებინა.
ამ დრომდე უცნობია რა მოხდა რეალურად იმ სახლში, სადაც ბესო ომიაძე, როგორც მისი ოჯახი ამტკიცებს უიარაღოდ და აბსოლუტურად ფხიზელი ჩავიდა, იქ კი გაშლილი სუფრა და შეზარხოშებული ადამიანები დახვდნენ.
პოლიციამ მკვლელობის ფაქტზე უკვე დააკავა ერთი პირი, რომელიც გარდაცვლილის ყოფილი რძლის ახალი ქმარია. imedinews-ის ინფორმაციით, ის ერთხელ უკვე ნასამართლევია მკვლელობისთვის ისრაელში.
ხაშურში კი მკვლელობა 3 მაისს, გვიან ღამით მოხდა. ფაქტთან დაკავშირებით, გამოძიება სსკ-ის 108-ე მუხლით დაიწყო, რაც განზრახ მკვლელობას გულისხმობს და 7-დან 15 წლამდე თავისუფლების აღკვეთას ითვალისწინებს.