ვანო ჩხარტიშვილი პატარკაციშვილის ქონების მითვისებას ისევ ცდილობს?!

თბილისის სააპელაციო სასამართლო ლონდონის სამეფო სასამართლოს გადაწყვეტილებას გაითვალისწინებს გარდაცვლილი მეგობრის გაძარცვაში
ლონდონის სასამართლოს მიერ მხილებული ბიზნესმენი ვანო ჩხარტიშვილი ქონების დასაბრუნებლად ბრძოლას საქართველოში კვლავ განაგრძობს.
თბილისის სააპელაციო სასამართლომ გადაწყვეტილება უნდა მიიღოს საქმეზე, რაც მსოფლიოში ყველაზე სამართლიან სასამართლოდ აღიარებულმა დიდი ბრიტანეთის სასამართლომ უკვე მიიღო. ლონდონის სამეფო სასამართლომ პატარკაციშვილის ოჯახის სარჩელი ვანო ჩხარტიშვილის წინააღმდეგ, ქართული კანონმდებლობით განიხილა და დაადგინა, რომ სადავო ქონების მესაკუთრე იმ დროისთვის უკვე გარდაცვლილი ბადრი პატარკაციშვილი, შესაბამისად, ქონების მემკვიდრე სწორედ მისი ოჯახი იყო.
მიუხედავად ამისა, ვანო ჩხარტიშვილი კვლავ განაგრძობს დავას საქართველოში. თბილისის სააპელაციო სასამართლოში ამ დავას სამოქალაქო საქმეთა პალატის მოსამართლე, მაია სულხანიშვილი იხილავს.
მოსამართლემ მხარეებს მორიგება შესთავაზა, რათა პროცესი, რომელიც დიდი ხანია დროში იწელება, დროულად დასრულდეს.
ვანო ჩხარტიშვილის წარმომადგენელმა, მამუკა ღვინიაშვილმა პროცესზე აღნიშნა, რომ მისი მარწმუნებელი მატერიალური ზარალის ანაზღაურების წინააღმდეგი არ არის. თუმცა ჩხარტიშვილის წარმომადგენელმა „ბლუ ტროპიკისა“ და „კოპელას“ ადვოკატებს ცნობილი საერთაშორისო აუდიტორული კომპანიის დაქირავება შესთავაზა, რომელიც თანხის ოდენობას განსაზღვრავდა. „ბლუ ტროპიკისა“ და „კოპელას“ ადვოკატის, ლაშა ბირკაიას განცხადებით, ამგვარი შეთავაზება საქმის გაჭიანურების მცდელობაა, რადგან ამ საქმეში იმდენი იურიდიული და სამართლებრივი ნიუანსია, რაც აუდიტორული კომპანიის კომპეტენციის საკითხს სცდება.
ვანო ჩხარტიშვილის წარმომადგენლების განცხადებით, პატარკაციშვილების ოჯახი მატერიალური ზარალის – 60 მილიონი აშშ დოლარის გადახდას ითხოვს, რასაც გარდაცვლილი ბიზნესმენის ოჯახის ინტერესების დამცველები უარყოფენ. ჩხარტიშვილის წარმომადგენელმა მხოლოდ 10 მილიონი აშშ დოლარის გადახდის სურვილი გამოთქვა, საბოლოოდ, მოსამართლე მაია სულხანიშვილმა მხარეებს 35 მილიონ აშშ დოლარზე მორიგება შესთავაზა. ცხადია, ამ საკითხს ადვოკატები ვერ გადაწყვეტენ და ამიტომ მოსამართლის ეს მორიგება საკუთარ მარწმუნებლებს უნდა გადასცენ. 28 ივნისს გამართულ სასამართლო სხდომაზე, ივანე ჩხარტიშვილის წარმომადგენელმა მამუკა ღვინიაშვილმა, მოსამართლე მაია სულხანიშვილს შუამდგომლობითაც მიმართა. ღვინიაშვილმა სასამართლოს დაწვრილებით განუმარტა ოსიპოვი-ჩხარტიშვილის მოლაპარაკების დეტალები. მისი თქმით, 2009-2010 წლებში, ოსიპოვი და ჩხარტიშვილი წისქვილკომბინატის ფასზე ვერ შეთანხმდნენ და საბოლოოდ ეს აქტივი კოკი ოსიპოვმა „თი-ბი-სი ბანკისგან“ შეიძინა. 2011 წლის გაზაფხულზე, ოსიპოვს პატარკაციშვილის მემკვიდრეები შეხვდნენ. მათ ოსიპოვს წარუდგინეს დოკუმენტები, რომ „ფოთის წისქვილქარხნის“ ქონება პატარკაციშვილების საკუთრებას წარმოადგენდა, შესაბამისად, კოკი ოსიპოვმა მათ 1 მილიონი აშშ დოლარი გადაუხადა. მამუკა ღვინიაშვილის განმარტებით, კოკი ოსიპოვის ეს ჩვენებები სარჩელში მითითებულ გარემოებას ადასტურებს. მიუხედავად „ბლუ ტროპიკ ლიმიტედის“ სახელზე „ფოთის წისქვილქარხნის“ აქციების რეგისტრაციისა, ქონების რეალურ მესაკუთრეს ივანე ჩხარტიშვილისა და არკადი პატარკაციშვილის ერთობლივი საქმიანობის ამხანაგობა წარმოადგენდა. მამუკა ღვინიაშვილმა სააპელაციო სასამართლოს შესთავაზა, რომ კოკი ოსიპოვი კიდევ ერთხელ დაკითხონ. მოსამართლე მაია სულხანიშვილმა ივანე ჩხარტიშვილის წარმომადგენლის, მამუკა ღვინიაშვილის შუამდგომლობა მოისმინა და მისი განხილვა შემდგომ პროცესზე გადადო. ამ საქმის მორიგი სასამართლო სხდომა, 27 სექტემბერს ჩაინიშნა. მოსამართლე მაია სულხანიშვილმა, 28 ივნისის სხდომაზე, მხოლოდ „ბლუ ტროპიკისა“ და „კოპელა ვენჩერს ლიმიტეტის“ ადვოკატის, ლაშა ბირკაიას შუამდგომლობა დააკმაყოფილა. კომპანიების წარმომადგენელმა სააპელაციო სასამართლოს მიმართა, რათა ამ საქმეზე ინგლისის სამეფო სასამართლოს გადაწყვეტილება მხედველობაში მიეღო.
წყარო: „ვერსია“