BASSIANI-ს მიერ 27 მაისს დაანონსებული აქცია მაინც გაიმართება, თუმცა სად და რა ფორმით, ჯერჯერობით უცნობია. ეს გადაწყვეტილება მოძრაობა თეთრი ხმაურის ოფისში, ორგანიზაციის წარმომადგენლებმა რამდენიმე საათიანი მსჯელობის შემდეგ მიიღეს.
თავდაპირველი მოთხოვნა კლუბ ბასიანის გახსნას უკავშირდებოდა, თუმცა ღამის კლუბს ლუქი გუშინ ახსნეს. აქციის ორგანიზატორები ახლა აცხადებენ, რომ ისინი აქციაზე რეპრესიულ ნარკოპოლიტკას და ღამის კლუბებში ჩატარებულ სპეცოპერაციებს გააპროტესტებენ.
11 მაისის ღამეს, თბილისის ღამის კლუბებში ბასიანსა და გალერიში შსს-მ სპეცოპერაციები ჩაატარა. მანამდე 8 ნარკორეალიზატორი დააკავეს. თეთრი ხმაურის მოძრაობამ და ახალგაზრდებმა ჩათვალეს, რომ სამართალდამცველებმა სპეცოპერაციისას ძალას გადაამეტეს და ამიტომ აქციები იმ ღამესვე გამართეს. პროტესტი 12-13 მაისსაც გაგრძელდა. აქციის მონაწილეებმა დაშლის გადაწყვეტილება მას შემდეგ მიიღეს, როცა პარალმენტის წინ თავად შინაგან საქმეთა მინისტრი მივიდა, რომელმაც მათ ბოდიში მოუხადა და პრობლემების მოგვარებას დაჰპირდა.
საბოლოოდ, თეთრი ხმაურის მიერ ორგანიზებული აქციის მონაწილეები პარლამენტის ტერიტორიიდან ავტობუსებით გაიყვანეს.