სულხან მოლაშვილის საქმესთან დაკავშირებით, სურვილის შემთხვევაში, კონკრეტული შედეგის დადგომა უმოკლეს დროშია შესაძლებელი, – განაცხადა მოლაშვილის ადვოკატმა, სოსო ბარათაშვილმა გადაცემა 2030-ში.
“ჯერ კიდევ 2011 წელს, წინა ხელისუფლების დროს, იუსტიციის სამინისტრომ სტრასბურგის სასამართლოს დეკლარაცია გაუგზავნა, სადაც სულხან მოლაშვილის მიმართ ჩადენილი მთელი რიგი დარღვევებია აღიარებული, მათ შორის – წამების ფაქტები. იგივე დოკუმენტში აღიარებულია, რომ მის მიმართ დისკრიმინაცია ხორციელდებოდა და დისკრიმინაცია მხოლოდ პოლიტიკური ნიშნით ხორციელდებოდა. წინა ხელისუფლებას ყველა ეს დარღვევა აღიარებული აქვს. შემიძლია, ეს დოკუმენტი გავასაჯაროო”, – განაცხადა ბარათაშვილმა.
როგორც მან აღნიშნა, სულხან მოლაშვილის უშუალო წამება მისი დაპატიმრებიდან რამდენიმე საათის განმავლობაში მოხდა.
“ამ ფაქტთან დაკავშირებით 3 ექსპერტიზა ჩატარდა – ჯანდაცვის საექსპერტო დაწესებულების, ქალბატონ მაია ნიკოლაიშვილის და წამების მსხვერპლთა ფსიქო-სოციალური რეაბილიტაციის ცენტრ „ემპათიის“ მიერ. ყველა დასკვნაში მითითებულია, რომ სულხან მოლაშვილს წამება აღენიშნებოდა. ექსპერტიზამ დაადასტურა მისი ნაამბობი, რომ ის სხვა ოთახში თვალახვეული გაიყვანეს, ელექტროდენს მიუერთეს და სხეული სიგარეტით ამოუწვეს. არც ერთი მისი განცხადების უარყოფა არ მომხდარა”, – განაცხადა ბარათაშვილმა.
მისი თქმით, მიხეილ სააკაშვილმა 2004 წელს, ჯერ კიდევ სასამართლო პროცესის დაწყებამდე, წინასწარი გამოძიების პროცესში გააკეთა განცხადება, რომ სულხან მოლაშვილს პირადად ის არ გაათავისუფლებდა.
“მიხეილ სააკაშვილმა 2004 წელს, ჯერ კიდევ სასამართლო პროცესის დაწყებამდე, წინასწარი გამოძიების პროცესში გააკეთა განცხადება, რომ სულხან მოლაშვილს პირადად ის არ გაათავისუფლებდა და მოლაშვილი ყოვლად გაუსაძლის პირობებში ზუსტად იმ ღამით გადაიყვანეს. ამიტომ, სულხან მოლაშვილის მიმართ განხორციელებულ არაადამიანურ მოპყრობას უშუალოდ მიხეილ სააკაშვილს ვუკავშირებ”, – განაცხადა სოსო ბარათაშვილმა.