არჩილ ტატუნაშვილის მამა გიორგი ტატუნაშვილმა სამხარაულის ექსპერტიზის ბიურო დატოვა. ტატუნაშილი გამოძიების ობიექტურობაში დარწმუნებულია. როგორც გიორგი ტატუნაშვილმა ჟურნალისტებს განუცხადა, მან ყველა კითხვაზე ამ ეტაპზე პასუხი მიიღო. მისივე თქმით, დაზიანებები, რომელზეც ოჯახს კითხვები აქვს, სიცოცხლისდროინდელი არ არის.
“მაინტერესებდა ცხვირზე და შუბლზე რა დაზიანებებიც იყო ის რატომ არ იყო ჩაწერილი დასკვნაში. როგორც მითხრეს ეს დაზიანებები არ იყო მიყენებული სიცოცხლის დროს. როგორც მითხრეს გადაკვალიფიცირდა საქმე წამების მუხლით. შსს თავიდან როგორც დამპირდა რომ გვერდში დამიდგებოდა, ყველანაირად მიდგას გვერდში. გამოძიების ობიექტურობაში რაც მთავარია ეჭვი არ მეპარება”, – განაცხადა არჩილ ტატუნაშვილის მამამ. 22 თებერვალს, საოკუპაციო რეჟიმმა საქართველოს 3 მოქალაქე – არჩილ ტატუნაშვილი, ლევან ქუტაშვილი და იოსებ პავლიაშვილი, ახალგორში დააკავა. 23 თებერვალს კი ცნობილი გახდა, რომ არჩილ ტატუნაშვილი გაურკვეველ ვითარებაში გარდაიცვალა. წითელი ჯვრის საერთაშორისო კომიტეტის მეშვეობით ოკუპირებულმა ცხინვალმა არჩილ ტატუნაშვილის ცხედარი ოჯახს 26 დღის შემდეგ, 20 მარტს, გადასცა. ცხედარს სამხარაულის სახელობის ექსპერტიზის ეროვნულ ბიუროში ექსპერტიზა ჩაუტარდა.