ხორავას ქუჩაზე მოკლული ერთ-ერთი მოზარდის, დავით სარალიძის მამა ზაზა სარალიძე, ადვოკატთან ერთად, დროებითი საგამოძიებო კომისიის წევრებს ხვდება.
სარალიძე კომისიის წევრებთან შესახვედრად საკანონმდებლო ორგანოში რამდენიმე წუთის წინ მივიდა.
როგორც სარალიძემ განაცხადა, ის კომისიას მის ხელთ არსებულ ყველა ინფორმაციას მიაწვდის.
ამასთან, მოკლული მოზარდის მამა აცხადებს, რომ საგამოძიებო კომისიაში, ეკა ბესელიას გარდა, ყველას ენდობა.
„ბესელიას რატომ არ ვენდობი? – „რუსთავი 2“-ზე კადრები გადაახვიეთ და მიხვდებით. ადამიანი, რომელიც მადანაშაულებს იმაში, რომ თითქოს რომელიმე პოლიტიკურ პარტიას მივეცი საშუალება, ჩემი შვილის სულით მანიპულირებდეს, ამ ადამიანს არ ვენდობი. კომისიას იმ ნაწილში ვენდობი, რომ აუცილებლად გამოააშკარავებენ პირებს, ვინც ეს საქმე გააყალბა და შეთითხნა“, – განაცხადა ზაზა სარალიძემ.
