ხორავას ქუჩაზე მომხდარი მკვლელობის საქმეზე დაკავებული მერაბ მორჩაძე ხორავას ქუჩაზე მომხდარი ჩხუბის ერთ-ერთი მონაწილის და მოწმის ბიძაა.
შსს-ს ინფორმაციით, სწორედ მან მოახდინა მოწმეზე ზემოქმედება.
მორჩაძე საგამოძიებო უწყებაში ხელბორკილებით რამდენიმე წუთის წინ შეიყვანეს. მისი განმარტებით, მისთვის დაპატიმრების მიზეზი უცნობია.
იმედინიუსის ინფორნაციით, მერაბ მორჩაძე ასევე ფიგურირებდა წითელ ბაღში, 1 თებერვალს მომხდარ სისხლიან გარჩევაში.
“საერთოდ წარმოდგენა არ მაქვს რა ხდება. მოვიდნენ, გამიკეთეს ბორკილები და აქ წამომიყვანეს,- განუცხადა მორჩაძემ ჟურნალისტებს.
მორჩაძეს ბრალს დღეს წაუყენებენ.
ხორავას ქუჩაზე მომხდარი მკვლელობის საქმესთან დაკავშირებით, მოწმეზე ზემოქმედების ფაქტზე, გამოძიებით მოპოვებული ახალი მტკიცებულებების საფუძველზე, მოსამართლის განჩინებით, სისხლის სამართლის კოდექსის 372-ე მუხლით, დაკავებულია 1973 წელს დაბადებული მერაბ მორჩაძე.
მერაბ მორჩაძის დაკავება განხორციელდა მკვლელობის ძირითადი საქმიდან გამოყოფილი იმ სისხლის სამართლის საქმის ფარგლებში, რომელზეც გამოძიებას შინაგან საქმეთა სამინისტრო აწარმოებს.