ხორავას ქუჩაზე მოზარდების მკვლელობის საქმის ფარგლებში დღეს, მოწმეზე ზემოქმედების ბრალდებით დაკავებული მერაბ მორჩაძის აღიარებამ, საქმის ფიგურანტებთან ნათესაობის შესახებ, ერთგვარი დაბნეულობა გამოიწვია და რთული გასაგები გახდა – ვინ ვისი ნათესავია.
როგორც imedinews-მა გაარკვია, მორჩაძე ნამდვილად არის მკვლელობის საქმეში დანაშაულის დაფარვის ბრალდებით დაპატიმრებული, შსს-ს ყოფილი თანამშრომლის, თენგიზ კალანდიას ნათესავი. ამას ორივე მხარე აღიარებს. თენგიზ კალანდიას ორი ვაჟი მონაწილეობდა გასული წლის 1 დეკემბერს მოზარდებს შორის სისხლიანი გარჩევის საქმეში. მათგან ერთ-ერთს, მიხეილ კალანდიას, გამოძიება ასევე დანაშაულის დაფარვას ედავება და ის გირაოთია გათავისუფლებული. რაც შეეხება მის უმცროს ძმას, ის არასრულწლოვნების გამო ასევე თავისუფალია და ოჯახის მეთვალყურეობის ქვეშ იმყოფება.
მიხეილ კალანდია საქმის ის ფიგურანტია, რომელმაც სასამართლოზე სამდღიანი დაკითხვის დროს იმდენჯერ შეცვალა ჩვენება, რამდენჯერაც სასამართლოში გამოცხადდა. imedinews-ის ინფორმაციით გამოძიება მორჩაძეს სწორედ მიხეილ კალანდიაზე ზემოქმედების გამო ედავება, რომ მას ჩვენება შეეცვალა.
თავის მხრივ, თენგიზ კალანდიას ოჯახი ყოფილ პროკურორს, მირზა სუბელიანს ენათესავება. სუბელიანი და კალანდია ქვისლები არიან – მათ ცოლად ჰყავთ დები.
ხორავას ქუჩის სისხლიანი გარჩევიდან ორ თვეში თბილისში, წითელ ბაღში კიდევ ერთი ინციდენტი მოხდა. ამ შემთხვევაშიც 1-ლი ექსპერიმენტული სკოლის მოსწავლეები ფიგურირებდნენ და მაშინაც საქმის ერთ-ერთი ფიგურანტის, ნ.ც-ს ნათესავი (ბიძა) მერაბ მორჩაძე გახლდათ, თუმცა ამ შემთხვევაში, მისი არასრულწლოვანი ნათესავი დაზარალებული იყო.
ამ ორ ინციდენტს შორის კავშირი ამ ეტაპზე არ დგინდება.