შინაგან საქმეთა მინისტრობის კანდიდატის, გიორგი გახარიას განცხადებით, უახლოეს დღეებში მოქალაქეები მედიასაშუალებებით იხილავენ სარეკლამო კლიპს, რომელიც მოუწოდებს, გახდნენ პოლიციის თანამშრომლები. შესაბამისად, შსს ახალგაზრდა კადრების მიზიდვას სარეკლამო რგოლით შეეცდება. ამის შესახებ გახარიამ პარლამენტში სიტყვით გამოსვლისას ილაპარაკა.
„ჩვენ ვხედავთ, რომ ასეთი სურვილი მოქალაქეებში სულ უფრო და უფრო იზრდება“ – განაცხადა გიორგი გახარიამ პარლამენტში, მინისტრობის კანდიდატების მოსმენაზე. გახარიას თქმით, წლის ბოლოსთვის შეიქმნება სამი ძირითადი ფუნქციის მქონე კრიმინალური პოლიცია: საუბნო მართლწესრიგის, საგამოძიებო და ოპერატიული.
“საუბნოს ნაწილში არსებული თანამშრომლებიდან უკვე ამორჩეული გვყავს 80 პოლიციელი, რომლებმაც უკვე დაასრულეს კვალიფიკაციის ამაღლების კურსების გავლა. იგივე მდგომარეობა გვაქვს საგამოძიებო ნაწილშიც“ – განაცხადა გახარიამ.