19 ნოემბერს საქართველოს მოსახლეობა მასშტაბური ინიციატივის შესახებ შეიტყობს, რომელიც პრემიერმინისტრს მამუკა ბახტაძეს და ხელისუფლებას ეკუთვნის. როგორც “იმედის კვირისთვის” გახდა ცნობილი, ეს ინიციატივა საქართველოს ნახევარ მილიონამდე მოქალაქეს შეეხება, რომელთაც ფინანსური სექტორისთვის ჯამში 1 მილიარდამდე ფინანსური დავალიანებები აქვთ.
პრემიერის ახალი ინიციატივა, რომლის შესახებ მეტი დეტალი ხვალ გახდება ცნობილი, საქართველოში ჭარბვალიანობის პრობლემის დაძლევას შეეხება.
პრემიერმინისტრი მამუკა ბახტაძე ჭარბვალიანობის პრობლემასა და მისი დაძლევის აუცილებლობაზე ჯერ კიდევ ფინანსთა მინისტრობის დროს საუბრობდა. ამ პრობლემის შესახებ განცხადებები გააკეთა პარტია “ქართული ოცნება – დემოკრატიული საქართველოს” თავმჯდომარემ ბიძინა ივანიშვილმაც, როდესაც ის პოლიტიკაში დაბრუნდა.
“იმედის კვირისთვის” ცნობილი გახდა, რომ მთავრობის 19 ნოემბრის სხდომაზე პრემიერმინისტრის ახალი ინიციატივა ჭარბვალიანობის შესახებ ოფიციალურად დარეგისტრირდება.
საქართველოს მთავრობის ახალი ინიციატივის შესახებ ცნობილი გახდა “ნაციონალური მოძრაობისთვის”, რომლის საპრეზიდენტო კანდიდატმაც დღეს ხელისუფლებას ე.წ. ბანკების შავი სიებიდან მოქალაქეების ამოღება მოსთხოვა. ვაშაძის ამ მოთხოვნას დღესვე კახა კალაძე გამოეხმაურა და თქვა, რომ ხელისუფლების ამ ახალმა ინიციატივამ ნაციონალური მოძრაობა შოკში ჩააგდო.
ფრაქცია “ქართული ოცნების” თავმჯდომარის შეფასებით, ნაციონალურმა მოძრაობამ დღეს პრემიერმინისტრის ამ ინიციატივის მისაკუთრება სცადა.