საქართველოს ოკუპაცია – ეს მოცემულობაა და თუ დღეს ვინმეს ამაში ეჭვი ეპარება, აქ უკვე პრობლემაა, – განაცხადა საქართველოს საგარეო საქმეთა მინისტრმა ილია დარჩიაშვილმა „ნაცმოძრაობის“ პარტნიორი EPP-ის მიერ შემუშავებული რეზოლუციის პროექტის შეფასებისას, რომელშიც აფხაზეთი ცალკე სახელმწიფოდ არის მოხსენიებული.
„თუკი ვინმე ამას შეგნებულად აკეთებდა, ეს არის ყოვლად უპასუხისმგებლო და ჩვენთვის მიუღებელი. საქართველოს ოკუპაცია – ეს მოცემულობაა და თუ დღეს ვინმეს ამაში ეჭვი ეპარება, აქ უკვე პრობლემა გვაქვს. ძალიან ბევრჯერ გვახსოვს რეზოლუციები, რომლებიც არის საფუძველს მოკლებული და არ ეფუძნება არაფერს. ჩვენ გვახსოვს დამოკიდებულება მსგავსი ტიპის რეზოლუციების შემოქმედების. მათთვის, ვინც მსგავსი ტიპის რეზოლუციებზე მუშაობს, მნიშვნელოვანი არ არის, რაც შიგნით წერია, მათთვის მნიშვნელოვანია, რა მიზანი აქვთ. შესაბამისად, ვფიქრობ, რომ აქაც სწორედ იგივე შემთხვევასთან გვაქვს საქმე“, – განაცხადა დარჩიაშვილმა.
მინისტრის თქმით, საქართველო აგრძელებს კომუნიკაციას პარტნიორებთან ქვეყნის წინაშე არსებული გამოწვევებთან გასამკლავებლად.
„საქართველო მყარად დგას საკუთარ პოზიციებზე, ჩვენ ვაგრძელებთ ჩვენს პარტნიორებთან კომუნიკაციებს იმ გამოწვევებზე, რომელშიც დღეს ქვეყანა არის. ჩვენ გვაქვს კონკრეტული ხედვა, როგორ გავუმკლავდეთ ამ გამოწვევებს. საქართველოს ევროპული ინტეგრაცია – ეს არის შეუქცევადი, გარდაუვალი პროცესი“, – აღნიშნა ილია დარჩიაშვილმა.