მოახლოებული საპრეზიდენტო არჩევნები უკრაინაში და კრემლის სავარაუდო ჩარევა – ბრიუსელში გამართულ კონფერენციაზე ეს საკითხი მსჯელობის მთავარი თემა იყო.
კენჭისყრა უკრაინაში 31 მარტს არის დანიშნული. მოწვეული ექსპერტების აზრით, არსებობს რეალური შანსი, რომ მოსკოვმა არჩევნებზე გავლენის მოხდენა სცადოს.
სწორედ ამიტომაც შეიქმნა პლატფორმა, რათა ევროპასა და ამერიკაში მოხდეს საჭირო ინფორმაციის მაქსიმალური გასაჯაროება.
როგორც ჩრდილო-ატლანტიკური ალიანსის ყოფილმა გენერალურმა მდივანმა ანდერს ფოგ რასმუსენმა განაცხადა, რუსეთის მიზანია, არამხოლოდ ის რომ უკრაინას ჰყავდეს ლოიალური პრეზიდენტი, არამედ მთავარი მიზანია, მოახდინოს საპრეზიდენტო არჩევნების დელეგიტიმაცია.
„რუსეთის მიზანია, უკრაინაში საარჩევნო პროცესის სრულად დელეგიტიმაცია, მოსკოვს სურს ძირი გამოუთხაროს გამარჯვებულის რეპუტაციას, და გააჩინოს ეჭვი უკრაინელი ხალხსა და საერთაშორისო თანამეგობრობაში იმის შესახებ, იყო თუ არა ეს არჩევნები სამართლიანი და თავისუფალი. რუსეთი აძლიერებს ნარატივს იმის შესახებ, რომ უკრაინა არის არშემდგარი ქვეყანა და მისი ინსტიტუციების ნდობა არ შეიძლება. სადაც ყველაფერი იყიდება, მათ შორის არჩვენების შედეგებიც. ეს ის სურათია, რომელიც რუსეთს უნდა უკრაინელებს და საერთაშორისო თანამეგობრობას აჩვენოს,” – განაცხადა ჩრდილო-ატლანტიკური ალიანსის ყოფილმა გენერალურმა მდივანმა ანდერს ფოგ რასმუსენმა.