თბილისის მერმა, კახა კალაძემ გლდანში მცხოვრებ 26 ოჯახს საკუთრების დამადასტურებელი დოკუმენტები გადასცა.
როგორც კალაძემ განაცხადა, მისი მერობის პერიოდში საცხოვრებელი ფართები 800-მდე ოჯახს დაუკანონდა.
“დღეს 26 ოჯახს გადავეცით ფართების საკუთრების დამადასტურებელი მოწმობა. ვულოცავ ამ ადამიანებს, ძალიან დიდია სიხარული და ყველაფერს გავაკეთებთ, რომ 2020 წლის განმავლობაში ბევრი ასეთი სიხარული იყოს. თქვენ იცით, რომ ეს პროგრამა უკვე დიდი ხანია მოქმედებს. მას შემდეგ, რაც ჩვენ ოფიციალურად შევუდექით ჩვენი უფლებამოსილების განხორციელებას. ეს იყო ჩემი დაპირება წინასაარჩევნოდ, რომ ასეთ ოჯახებს დავეხმარებოდით და ხელს შევუწყობდით. მათ წლების განმავლობაში ჰქონდათ გარკვეული პრობლემები, შეიძლება ბიუროკრატიულიც, შეიძლება საბუთების მოგროვების თვალსაზრისით. გამგეობებისა და მუნიციპალიტეტის ყველა სამსახურის ჩართულობით, 800-ზე მეტ ოჯახს უკვე მიეცა შესაძლებლობა, ის ბინები, სადაც ისინი ათეულობით წელი ცხოვრობენ, დაეკანონებინათ“, – განაცხადა კალაძემ.
თბილისის მერიის ინფორმაციით, გლდანის I მ/რ-ის N3ბ-ში 17 ოჯახი 20 წელია ცხოვრობს, ხოლო გმირი კურსანტების N1-ში 9 ოჯახი – 10 წელზე მეტია. ამ ოჯახებმა საცხოვრებელი ფართები სიმბოლურ ფასად – ერთ ლარად მიიღეს.