“ქართულ-ამერიკული სამხედრო წვრთენბის “ღირსეული პარტნიორი 2016-ის” ჩატარებას დადებითად ვაფასებს. ეს არის ჩვენი თავდაცვისუნარიანობისკენ გადადგმული კიდევ ერთი ნაბიჯი. აღნიშნული წვრთნები არ არის საშიშროების შემცველი მესამე მხარისთვის. ის დაიგეგმა რამდენიმე თვის წინ. მსგავსი წვრთნები ჩატარდა შარშანაც და შარშანწინაც. რაც შეეხება უსუფაშვილის განცხადებას, სანამ აფხაზეთი და ცხინვალი ოკუპირებულია და დასაბრუნებული გვაქვს, ქართულ ჯარს თავისი მისია შესასრულებელი აქვსო, არა მგონია, გამწვავება გამოეწვია . პარლამენტის თავმჯდომარემ თქვა ის, რაც უნდა ეთქვა ნებისმიერი პოლიტიკური თანამდებობის პირს. მით უმეტეს, საქართველოში. უჩვეულო არაფერი უთქვამს“, – აცხადებს ექსპერტი ვახტანგ მაისაია გაზეთ “ახალი თაობისთვის” მიცემულ ინტერვიუში, სათაურით ვახტანგ მაისაია: “საქართველო ცივი ომის ფრონტის ხაზზეა”/ “ნატოს წვრთები ქართული ჯარის თავდაცვისუნარიანობას აამაღლებს.”
“უსუფაშვილმა თქვა, რომ მას არ უგულისხმია ძალისმიერი გზით ტერიტორიების დაბრუნება. მან თქვა, რომ საჯარისო შენაერთებმა უნდა შეასრულონ დავალებები გარკვეული დროის განმავლობაში. დავით უსუფაშვილი რჩება მშვიდობისმოყვარე პოლიტიკოსად. წვრთნები ნატოს სულისკვეთებით ტარდება. ამან გააღიზიანა რუსეთი, რადგან ამ ეტაპზე ნატოსა და რუსეთს შორის უკიდურესად დაძაბული ურთიერთობაა. ბუნებრივია, რუსეთი ყველანაირად ცდილობს, რომ ნატოს ეგიდით ჩატარებული წვრთნა აღიქვას, როგორც მის წინააღმდეგ გადადგმულიი მტრული ნაბიჯი. შარშან და შარშანწინ ასეთი ფონი არ იყო. ზოგიერთი სპეციალისტი და ექსპერტი არ გამორიცხავს ამ ორ გეოპოლიტიკურ აქტიორს შორის სამხედრო შეტაკებასაც. რუსეთმა ცოტა ხნის წინ ნარაერთი სამხედრო ოპერაცია განახორციელა. ამიტომ ვითარება საკმაოდ გამწვავებულია“, – აღნიშნავს რესპონდენტი.
“ჩვენთვის საკმაოდ მნიშვნელოვანი წვრთნებია, რომელიც ნატოს კოალიციურ ჯარებთან ჩვენი ჯარის თავსებადობის მიღწევისთვის აუცილებელი კომპონენტია. წყდება თავდაცვის ტიპის ამოცანები. შეტევითი სცენარები არ არის გათვალისწინებული. ბუნებრივია, ამაღლდება ჩვენი შეიარაღებული ძალების თავდაცვისუნარიანობის დონე. ეს აუცილებელია, რადგან ჩვენ ვმონაწილეობთ საერთაშორისო მისიებში. ასევე საქართველოს შეიარაღებული ძალები ხდებიან ნატოს სწრაფი რეაგირების ძალების შემადგენელი ნაწილი. ამერიკის შენაერთი და სამხედრო ტექნიკა, რა თქმა უნდა, საქართველოში არ დარჩება. ტექნიკა და შენაერთი მხოლოდ წვრთენბის ფარგლებში გამოიყენება. გართულებული გეოსტარტეგიული ფონია. შესაბამისად, მხარეები ერთმანეთს აღიქვამენ სამხედრო მოწინააღმდეგეებად. მხარის ნებისმიერი გადაადგილება მეორეს მხრიდან საფრთხედ აღიქმება. ნატო-რუსეთის შეტაკება შეიძლება მოხდეს ბალტიისპირეთში, შავი ზღვისპირეთში. ორივე მხარე სამხედრო რიტორიკას იყენებს ფართო მასშტაბით. ნატოელები თვლიან, რომ ეს რუსეთის აგრესიული სამხედრო პოლიტიკის შედეგია. შესაბამისად, ის უკან არ დაიხევს. არც ნატო და არც რუსეთი უკან დამხევი არ არიან. საქართველო და უკრაინა ცივი ომის ფრონტის ხაზზეა“, – დასძენს ექსპერტი და კითხვას – ” როგორ აფასებთ ზოგიერთი პოლიტიკოსის შეშფოთებას ნატოს წვრთნებთან დაკავშირებით? “, – პასუხობს:
“მათ არ გააჩნიათ საკმარისი სამხედრო ცოდნა. წვრთნები თავისი შინაარსით თავდაცვითი ტაქტიკური ამოცანების შესრულებისთვის ტარდება.”