დამოუკიდებელი საქართველოს ისტორიაში არასოდეს ყოფილა ამდენი სხვადასხვაგვარი ინსტრუმენტი საქმიანი, ინიციატივიანი ადამიანის დასახმარებლად, რომელსაც სურს, წამოიწყოს თუ გააფართოოს თავისი ბიზნესი, – ამის შესახებ საქართველოს პრემიერ-მინისტრმა გიორგი კვირიკაშვილმა სასოფლო-სამეურნეო დარგის მეწარმეებთან შეხვედრისას განაცხადა, რომლებმაც სახელმწიფოს დახმარებით, ახალი საწარმოები შექმნეს და არსებული – გააფართოეს.
150 მეწარმე დღეს კოოპერატივ „დარჩელში“ შეიკრიბა, რომელიც სოფლის მეურნეობის განვითარების თანამედროვე მოდელს წარმოადგენს.
პრემიერ-მინისტრმა აღნიშნა, რომ ახალი საწარმოების შექმნა არის მნიშვნელოვანი ლოკომოტივი ქვეყნის განვითარებისთვის და მადლობა გადაუხადა მეწარმეებს, რომელთა ბიზნესინიციატივის გარეშე, მთავრობის ძალისხმევა შედეგს ვერ მოიტანდა.
“დღეს აქ წარმოდგენილი არიან დიდი და შედარებით მცირე საწარმოები. დიდი საწარმოების შემთხვევაში გვქონდა სპეციალური დახმარების პაკეტები, რომლებიც მორგებული იყო უფრო დიდ ინიციატივებზე. მცირე საწარმოების შემთხვევაში სახელმწიფომ შეიმუშავა სპეციალური ინსტრუმენტები, რომლითაც ისინი წახალისდნენ. დღეს საწარმოს სიდიდეს არანაირი მნიშვნელობა არ აქვს. ჩვენ კიდევ ერთხელ გვინდა, ხაზი გავუსვათ, რამხელა შესაძლებლობები არსებობს დღეს საქართველოში ინიციატივიანი, გამრჯე ადამიანისთვის, რომელსაც აქვს სურვილი, თვითონ გახდეს ბიზნესის მფლობელი, თვითონ უზრუნველყოს საკუთარი ცხოვრება, არ ეძებოს სამუშაო ადგილი სხვაგან, არ მიადგეს დასაქმების სათხოვნელად მთავრობას, არამედ თვითონ იფიქროს იმაზე, რომ სხვები დაასაქმოს. ეს არის ის ფსიქოლოგიური ტრანსფორმაცია, რევოლუცია, რომელიც მთელი ჩვენი ერის აზროვნებაშია მოსახდენი და ეს არის ყველაზე სასიხარულო”, – განაცხადა პრემიერმა და აღნიშნა, რომ ეს იყო უმთავრესი მიზანი, რომელსაც მთავრობა მრავალი სახელმწიფო პროგრამის წამოწყებისას ისახავდა.
გიორგი კვირიკაშვილმა ხაზგასმით აღნიშნა, რომ სახელმწიფო ამ მხარდაჭერის პროგრამებს აუცილებლად განაგრძობს და პირადად ყველაფერს გააკეთებს, რომ უკვე შექმნილი კომპანიებისთვის რომლებიც ხელისუფლების თანადგომა კიდევ უფრო გაფართოვდეს, შემუშავდეს საინტერესო ინსტრუმენტები რათა, რათა მათ მუშაობა და პროდუქციის რეალიზაცია გაუმარტივდეთ, მიიღონ მეტი შემოსავალი, განახორციელონ ექსპორტი და აითვისონ ახალი ბაზრები.
“მთავარი მიზანი იმისა, რასაც ერთად ვაკეთებთ, არის ის, რომ საქართველოს თითოეულმა მოქალაქემ შეიგრძნოს ეს შესაძლებლობები, რომელიც დღეს არის. დღეს ჩვენ ვიმყოფებით დარჩელში. ეს შემთხვევითი არ არის, რადგან ეს არის სწორედ ადგილი, სადაც 600 მცირე გლეხური მეურნეობისგან შეიქმნა კოოპერატივი, რომელიც გაცილებით უფრო ეფექტიანად აწარმოებს ნაწარმს, დანერგა ახალი ტექნოლოგიები, შემაცირა თითოეული მონაწილის დანახარჯები და ეფექტური გახადა წარმოება მთლიანობაში. ეს კოოპერატივი მნიშვნელოვანია, იმიტომ რომ დღეს ჩვენ საქართველოს გაძლიერებას სწორედ ამგვარი მოდელის მეშვეობით ვხედავთ”, – განაცხადა პრემიერმა.
გიორგი კვირიკაშვილის შეფასებით, სოფლის მეურნეობა სტრატეგიული დარგია; დღეს ქვეყნის მოსახლეობის ნახევარზე მეტი ჩაბმულია სოფლის მეურნეობაში და იმისთვის, რომ დარგი გახდეს უფრო კონკურენტუნარიანი, აწარმოოს იმ სტანდარტების, იმ ხარისხის პროდუქცია, რომელიც მოთხოვნადი იქნება, არა მხოლოდ საქართველოში, არამედ საქართველოს ფარგლებს გარეთ, საჭიროა გადაიარაღება და ახალი ტექნოლოგიები.
“საგარეო ბაზარი გვჭირდება იმიტომ, რომ 3,7 მილიონი მოსახლეობის ბაზარზე გათვლილი წარმოება ძალიან რთულია, იყოს კონკურენტუნარიანი იმ წარმოებებთან მიმართებაში, რომლებიც გათვლილია 50 ან 100-მილიონიანი მომხმარებლის ბაზარზე. ამიტომ, ჩვენთვის ძალიან მნიშვნელოვანია, თითოეული წარმოება, რომელიც საქართველოში შეიქმნება, გათვლილი იყოს ექსპორტზე, რათა უფრო კონკურენტუნარიანი და წარმატებული იყოს”,- განაცხადა პრემიერმა.
გიორგი კვირიკაშვილის თქმით, თანამედროვე ტექნოლოგიებთან ერთად, მნიშშვნელოვანია გადაიარაღება, რომლის ორი აპრობირებული გზა არსებობს – მსხვილი ინვესტორების შემოყვანა, ამ გზით სასოფლო-სამეურნეო ნაკვეთების გაერთიანება და მაშსტაბური, ეფექტიანი საწარმოს შექმნა, რომელიც ყველა მოთხოვნას დააკმაყოფილებს, ხოლო, მეორეა – კოოპერაცია.
როგორც პრემიერმა აღნიშნა, კოოპერაცია, დარჩელის შემთხვევაში, ნიშნავს 600 მცირე მეწარმის და მფლობელის გართიანებას ერთიან საწარმოში, ისე რომ კოოპერატივის არც ერთი მონაწილე არ კარგავს საკუთრებას მიწასა და ქონებაზე, მაგრამ კოოპერაციისა და სპეციალური სახელმწიფო დახმარების მეშვეობით ისინი ახდენენ ისეთ გადაიარაღებას, რომლის მეშვეობით აღწევენ საერთაშორისო სტანდარტს და ხდებიან კონკურენტუნარიანი.
“ანუ, როგორც ეკონომისტეები ამბობენ, ისინი აღწევენ მასშტაბის ეკონომიას. რა თქმა უნდა, საქართველოს რეალობაში გაცილებით უფრო მომგებიანად მიგვაჩნია კოოპერაციის გზით გამსხვილება, ანუ ისე, რომ წვრილი მეწარმე, გლეხი არ კარგავს საკუთრებას საკუთარ მიწაზე, არ ხდება დაქირავებული მსხვილ საწარმოში, ანუ ერთი ინვესტორის ქვეშ, არამედ ინარჩუნებს საკუთარ მიწას, საკუთარ ნაკვეთს თუ ქონებას, მაგრამ კოოპერაციის მეშვეობით ნერგავს ახალ ტექნოლოგიებს, იყენებს სახელმწიფოს მიერ შექმნილ სპეციალურ მექანიზმებს და სწორედ ამ გზით იქმნება მაშსტაბური საწარმო, რომელიც კონკურენტუნარიანი ხდება საერთაშორისო მასშტაბით და, რა თქმა უნდა, ადგილობრივ ბაზარზეც. სწორედ ამის მაგალითია დარჩელის კოოპერატივი და გვიხარია, რომ უკვე 1638 კოოპერატივია დარეგისტრირებული”, – განაცხადა პრემიერ-მინისტრმა და განსაკუთრებული მადლობა გადაუხადა სოფლი სმეურნეობის სამინისტროს, მინისტრ ოთარ დანელიას, მისი გუნდის ყველა წევრს, რომლებმაც, ევროპელ პარტნიორებთან ერთად, ძალიან მნიშვნელოვანი როლი ითამაშეს ამ ძალიან მნიშვნელოვანი პროექტის განხორციელებაში.
პრემიერ-მინისტრი მიიჩნევს, რომ ეს გზა უნდა გაგრძელდეს და სახელმწიფომ ამგვარი კოოპერაციის წახალისება უნდა განაგრძოს.