ქუთაისის უნივერსიტეტი გახლავთ ჭეშმარიტად ევროპული, მსოფლიო დონის უნივერსიტეტი, – ამის შესახებ „იმედის“ გადაცემაში „არენა“ განათლების, მეცნიერების, კულტურის და სპორტის მინისტრმა, მიხეილ ჩხენკელმა განაცხადა. მისივე თქმით, პროექტის განხორციელება ბიძინა ივანიშვილის გარეშე შეუძლებელი იქნებოდა.
„როგორც მოგეხსნებათ, უნივერსიტეტის იდეის და კონცეფციის ავტორი გახლავთ ბატონი ბიძინა ივანიშვილი და ამ დონის და ამ რანგის უნივერსიტეტი საქართველოში ვერ დაფუძნდებოდა, რომ არა ბატონი ბიძინა ივანიშვილი და მისი ოჯახის ქველმოქმედება, რომელიც შეადგენს 1 მილიარდ ევროს. ეს უნივერსიტეტი იქნება განთავსებული ულტრა-თანამედროვე კამპუსზე და ლექციების წაიკითხავენ წამყვანი პროფესორები მთელი მსოფლიოდან“, – აღნიშნა მინისტრმა.
მისი თქმით, უნივერსიტეტს უკვე ჰყავს პარტნიორები მსოფლიოს წამყვანი უნივერსიტეტებიდან ქართველ პროფესორებთან ერთად წაიკითხავენ ლექციებს სტუდენტებისთვის და ამ პროცესში ონლაინ-ლექციების კონცეფციას გამოიყენებენ. ამ საკითხზე მუშაობა პანდემიამდე დიდი ხნით ადრე დაიწყო.
მან ასევე ხაზი გაუსვა ადრონული თერაპიის ცენტრის პროექტს, რომელიც უნივერსიტეტის ნაწილია და სადაც სიმსივნის მკურნალობასთან დაკავშირებით ჩატარდება სამუშაოები.
„ადრონული თერაპიის ცენტრი იქნება ასევე მსოფლიო დონის ცენტრი, სადაც სიმსივნის მკურნალობასთან ერთად ძალიან დიდი ყურადღება დაეთმობა სამეცნიერო კვლევით პროცესს სწორედ სიმსივნის კვლევის მიმართულებით. აქ იქნება ძალიან მაღალი რანგის კვლევები ფიზიკაში, სამედიცინო ფიზიკაში, ბირთვულ ფიზიკაში, სადაც ჩვენ უკვე გვაქვს თანხმობა მსოფლიოს წამყვანი მეცნიერებისგან, როგორც ევროპიდან, ასევე აშშ-დან, რომ ისინი ძალიან აქტიურად ჩაერთვებიან ქართველ მეცნიერებთან ერთად იმ სამეცნიერო-კვლევით პროცესში, რომელიც წარიმართება ადრონული თერაპიის ცენტრში“, – განმარტა ჩხენკელმა.