უკრაინის ქალაქ ბროვარში მომხდარი ხალხმრავალი დაპირისპირებისას 3 ადამიანი დაიჭრა. ადგილობრივი მედიის ცნობით, ჩხუბში 67 ადამიანი მონაწილეობდა, რომელთა ნაწილიც სანადირო თოფებით იყო შეიარაღებული.
კონფლიქტის მიზეზი ბროვარი-კიევის მიმართულებით მგზავრთა გადაყვანის სფეროში ლეგალურად და არალეგალურად მომუშავე ჯგუფებს შორის ბიზნესის გადანაწილება გახდა. დაკავებულია 22 ადამიანი, ამოღებულია 16 თოფი.
„ბროვარსა და კიევს შორის მგზავრთა გადაყვანის ბიზნესის შემოსავალი დღეში დაახლოებით 600 ათასი გრივნაა, წელიწადში – 220 მილიონი. ამ ბაზარზე მოქმედებენ როგორც ლეგალური, ისე არალეგალური ჯგუფები, რომლებიც ერთმანეთს ამ ბიზნესში არსებული არალეგალური ფულისთვის დაუპირისპირდნენ და ბანდიტები დაიქირავეს, როგორც ეს 90-იანებში ხდებოდა. 3 დაჭრილი საავადმყოფოშია, მათ სიცოცხლეს საფრთხე არ ემუქრება“, – განაცხადა უკრაინის შინაგან საქმეთა მინისტრმა, არსენ ავაკოვმა.