რუსი ოპოზიციონერი ალექსეი ნავალნი ბერლინის საავადმყოფოდან გაწერეს. მედიკოსები მის სრულად გამოჯანმრთელების შესაძლებლობას რეალურად მიიჩნევენ. ამ დროისთვის რთულია იმის პროგნოზირება, ინტოქსიკაციას მომავალში რა სახის შედეგები შეიძლება მოყვეს.
საავადმყოფოდან გაწერამდე ნავალნი საფრანგეთისა და რუსეთის პრეზიდენტებს შორის გასულ კვირას შემდგარ სატელეფონო საუბარს გამოეხმაურა, რა დროსაც ვლადიმირ პუტინმა რუსი ოპოზიციონერის მოწამვლასთან დაკავშირებით ემანუელ მაკრონს ურჩია, სხვა ვერსიებიც განეხილათ. მათ შორის ნავალნის მიერ თვითმოწამვლის ვერსიაც.
„ვლადიმირ პუტინმა ფრანგ კოლეგას შეატყობინა: „ნავალნის შეეძლო თავად მიეღო ეს შხამი“. კარგი ვერსიაა. მიმაჩნია, ყველაზე დეტალურ შესწავლას საჭიროებს. სამზარეულოში მოვადუღე „ნოვიჩოკი“ კომაში ჩავვარდი. მანამდე შევუთანხმდი ცოლს, მეგობრებსა და კოლეგებს, რომ თუ ჯანდაცვის სამინისტრო დაიჟინებს, სამკურნალოდ გერმანიაში გადამიყვანონ. მათ არავითარ შემთხვევაში არ დაუშვან ეს. მოვმკვდარიყავი ომსკის საავადმყოფოში და აღმოვჩენილიყავი ომსკის მორგში, სადაც გარდაცვალების მიზეზად დაადგენდნენ „საკმარისად იცოცხლა“ – აი, ასეთია ჩემი ეშმაკური გეგმის საბოლოო ჯაჭვი. თუმცა, პუტინმა მაჯობა. მას ასე მარტივად ვერ გააცურებ. საბოლოო ჯამში, მე, როგორ სულელი, კომაში 18 დღე ვიმყოფებოდი, თუმცა ჩემსას მივაღწიე. პროვოკაცია არ შედგა“ – წერს ნავალნი.