ვაქცინის შესანახად საქართველოში დამატებითი მაცივრების ყიდვის საჭიროება არ არის, – ამის შესახებ ჯანდაცვის მინისტრმა, ეკატერინე ტიკარაძემ „რუსთავი 2“-ის ეთერში განაცხადა. ეკატერინე ტიკარაძის თქმით, საქართველო COVAX-პლატფორმიდან ელოდება პასუხს, სადაც მითითებული იქნება ზუსტი დრო, როდის ჩამოვა ქვეყანაში ვაქცინა.
„საქართველოში არ გვესაჭიროება დამატებითი მაცივრების შეძენა, ვინაიდან ეს მოცულობა სრულად აკმაყოფილებს იმ გეგმაზომიერი ვაქცინაციის ვაქცინების შენახვას, რასაც ვაპირებთ. ასე რომ, ეს გეგმა ჩვენ არ გაგვაჩნია, რადგან საჭიროება არ არის. ჩვენ გავამზადეთ საპასუხო წერილი, რომელიც ორშაბათს იქნება გაგზავნილი და დაველოდებით მათ პასუხს, როდესაც ისინი დაასახელებენ, როგორც ვაქცინების ზუსტ რაოდენობას, ასევე მოწოდების ზუსტ თარიღს“, – აღნიშნა ეკატერინე ტიკარაძემ.