ნამდვილად ვეთანხმები იაგო ხვიჩიას, როცა არც ხალხია შენს მხარეს, არც საერთაშორისო საზოგადოება და არც სიმართლე, ქუდი უნდა დაიხურო და საქმეს მიხედო, – ასე გამოეხმაურა საპარლამენტო უმრავლესობის წევრი, ბექა დავითულიანი „გირჩის“ ერთ-ერთი ლიდერის, იაგო ხვიჩიას განცხადებას.
მისი თქმით, ოპოზიციას მხოლოდ დესტრუქციის და არეულობის იმედი აქვს და ამის შესაძლებლობას მათ ხელისუფლება არ მისცემს.
„შეგიძლიათ დააკოპიროთ (ხვიჩიას კითხვა) და იმავე კითხვას დავსვამ მეც, ნამდვილად ვეთანხმები, როცა არც ხალხია შენს მხარეს, არც საერთაშორისო საზოგადოება და არც სიმართლე, ქუდი უნდა დაიხურო და საქმეს მიხედო. მათ სიმართლე გითხრათ, არაფრის იმედი აქვთ, ასეთი შეგრძნება მაქვს. არეულობის, დესტრუქციის და იმის იმედი აქვთ, რომ პანდემიით გამოწვეული ეკონომიკური კრიზისის ფონზე ხალხს მოთმინების ფიალა აევსება, გამოვლენ და ხელისუფლებას დაამხობენ და ეს არ და ვერ მოხდება, ამის საშუალებას ამ ოპოზიციურ ძალებს ნამდვილად არ მივცემთ, ამიტომ არაფრის იმედი აქვთ“ – განაცხადა ბექა დავითულიანმა.
ის ასევე გამოეხმაურა ალეკო ელისაშვილის განცხადებას გიორგი ვაშაძეზე შესაძლო ზეწოლის შესახებ და აღნიშნა, რომ „თუ მორალურ შანტაჟზე არ ვსაუბრობთ, ყველა დანარჩენი ტიპის შანტაჟი სისხლის სამართლის დანაშაულია და შესაბამისი რეაგირება სჭირდება“.
„გირჩის“ წევრმა იაგო ხვიჩამ განაცხადა, რომ ელჩებთან შეხვედრების დროს ნათლად ჩანდა, ისინი არ იყვნენ ოპოზიციის მხარეს. „ჩვენ დავინახეთ პროცესი, რომ ელჩები არ არიან ჩვენკენ. მერე ეს დადასტურდა იმით, რომ გამოვიდა ამერიკის ელჩი და პარლამენტში შედითო გვითხრა, მაგრამ ეს ტენდენცია მანამდეც ჩანდა“, – განაცხადა იაგო ხვიჩიამ.