შვეიცარიაში ავტოსაგზაო შემთხვევას მსხვერპლი მოჰყვა.
ადგილობრივი პოლიციის ცნობით, ტურისტული ავტობუსი გრაუბიუნდენის კანტონის სოფელ სუშთან ბარიერს შეეჯახა, რის შემდეგაც გზიდან გადავიდა და გადაბრუნდა.
როგორც ცნობილია, ავტობუსში ნიდერლანდელი ტურისტები იმყოფებოდნენ. ნიდერლანდების ტურისტული კომპანიების ასოციაციის წარმომადგენლის ინფორმაციით, ავტობუსში სულ 48 მგზავრი იმყოფებოდა და ყველა მათგანი ნიდერლანდების მოქალაქეა.
დაშავებულებისა და დაღუპულების ზუსტი რაოდენობა ჯერ უცნობია.
მომხდარის გამო მწუხარება გამოთქვა შვეიცარიის პრეზიდენტმა, გი პარმელინმა.
„ღრმად ვარ შეძრწუნებული და დამწუხრებული გრაუბიუნდენში მომხდარი იმ ტრაგიკული შემთხვევის გამო. გულწრფელ სამძიმარს ვუცხადებ დაღუპულთა ოჯახებს. შვეიცარიის შესაბამისი უწყებები უზრუნველყოფენ ყოვლისმომცველი და საფუძვლიანი გამოძიების ჩატარებას, რათა დადგინდეს შემთხვევასთან დაკავშირებული ყველა გარემოება“, – განაცხადა შვეიცარიის პრეზიდენტმა.