ეს დღეებია, ვფიქრობ, რომ უკვე მეტისმეტი მოგვდის და ერთმანეთისთვის ტალახის სროლაში ძალიან შევტოპეთ, – ამის შესახებ პარტია „მოქალაქეების“ ლიდერმა „ტვ პირველის“ ეთერში, გადაცემაში „რეაქცია“, ოპოზიციაში ბოლო დროს განვითარებულ მოვლენებზე საუბრისას განაცხადა.
„ძალიან შორს წავედით და სინამდვილეში დაგვავიწყდა ყველაზე მთავარი, რისთვისაც აგვირჩიეს, მხარი დაგვიჭირეს და წესით, რისთვისაც უნდა ვირჯებოდეთ პოლიტიკოსები. ესაა ეს გაჭირვებული ქვეყანა. ათიათასობით ადამიანია ულუკმაპუროდ დარჩენილი, მათზე არავინ არ ლაპარაკობს და მთელი დღეები, გაჩაღებული „ეს იქ შეეთრევა“… არც მე არ ვაკლებ, კი ბატონო, ჩემი თავიდან დავიწყებ, მაგრამ მაშინ ცეცხლი გასახსნელი იყო. ერთადერთი, რასაც ვნანობ, ისაა, რომ უკვე მეტისმეტია და უკვე ყელში ამოვიდა ამდენი ზიზღი, პირველ რიგში, ამას ჩემს თავზე ვამბობ, მაგრამ მაშინ ჩვენ რომ ყვირილი არ აგვეტეხა, მოლაპარაკება ჩაიშლებოდა და ყველაფერი დამთავრდებოდა. მოლაპარაკებები ჯერ ჩაშლილი არაა“ – განაცხადა ალეკო ელისაშვილმა.
ხელისუფლებასა და ოპოზიციას შორის მოლაპარაკების მეხუთე რაუნდის მოლოდინის პარალელურად, არჩევნებში ბარიერგადალახული ოპოზიციური პარტიები ერთმანეთთან კონსულტაციებს მართავენ. ასეთი შეხვედრა „მოქალაქეებსა“ და „გირჩს“ შორის შედგა.