ასე ემართება ყველას ვინც ირჩევს ემსახუროს არა ხალხს, არამედ კონკრეტულ ჯგუფებს, – განაცხადა ადამიანის უფლებათა დაცვისა და სამოქალაქო ინტეგრაციის საპარლამენტო კომიტეტის თავმჯდომარემ, რატი იონათამიშვილმა მაკრონის და მერცის რეიტინგის ვარდნაზე.
მისი თქმით, ორივე ლიდერი მოქმედებს არა საკუთარი ხალხის ინტერესებით, არამედ კონკრეტული ჯგუფების გავლენებით.
„ფაქტია, რომ ევროპელი ლიდერების პრიორიტეტები აცდენილია ევროპელი ხალხის პრიორიტეტებისგან. მერციც და მაკრონიც პირველ რიგში ითვალისწინებენ არა იმ პრიორიტეტებს, რაც გერმანელ და ფრანგ ხალხს გააჩნია, არამედ სამწუხაროდ, კონკრეტული ბიუროკრატების და ჯგუფების მიმართულებით მუშაობენ. ამიტომ ეს რეიტინგები პირდაპირ ასახავს იმ განწყობებს და ასე ემართება ყველას ვინც ირჩევს ემსახუროს არა ხალხს, არამედ კონკრეტულ ჯგუფებს“, – განაცხადა რატი იონათამიშვილმა.
საფრანგეთში მაკრონის, გერმანიაში კი მერცის რეიტინგი დაბალ ნიშნულზეა. კვლევებით, ორივე ქვეყანაში მოსახლეობის უმრავლესობა მთავრობის საქმიანობით უკმაყოფილოა.