ოპოზიციამ ტელევიზორში თუ არ ნახა რას ჩადიან, ისე ვერ აფასებენ რეალურად მოვლენებს. მეგონა, განსჯის უნარი ჰქონდათ. მერე, როცა კადრები ნახეს, ეტყობა მიხვდნენ, რომ პიკეტირება არ ვარგა და არ შეიძლება კონსტრუქციულ ნაბიჯად ჩაითვალოს, – ასე შეაფასა მამუკა მდინარაძემ ოპოზიციის დღევანდელი აქცია. ფრაქცია „ქართული ოცნების“ თავმჯდომარე აღნიშნავს, რომ მოლაპარაკებებიდან რამდენიმე საათში საკანონმდებლო ორგანოს პიკეტირება წარმოუდგენელია.
„არავის დაუძალებია მათთვის სიტყვა პიკეტირების ხსენება და შემდეგ აღსრულება. შესაბამისად, მართლა ძალიან ცუდი იყო, რბილად რომ ვთქვათ, როცა შეთანხმებიდან, მოლაპარაკებიდან რამდენიმე საათში, ახალი ეტაპის დაწყებიდან, მაინც გადავიდნენ პარლამენტის პიკეტირებაზე. წარმოუდგენელი ამბავია გააკეთეს, კარგია, რომ ბოლოს მაინც მიხვდნენ“, – განაცხადა მდინარაძემ.