ყველაზე მეტად ვისაც არ უნდა ნიკა მელიას გარეთ ყოფნა, არის ის ადამიანი, ვინც დღეს პლებისციტის მიუღებლობაზე საუბრობს, ეს არის მიხეილ სააკაშვილი, – ამის შესახებ ჟურნალისტებს საპარლამენტო უმრავლესობის წარმომადგენელმა, სოზარ სუბარმა „ნაციონალური მოძრაობის“ ლიდერ ნიკა მელიას გათავისუფლებისა და ოპოზიციასთან მოლაპარაკების საკითხებზე საუბრისას განუცხადა.
მისი თქმით, მოლაპარაკებების პროცესი პირველი წუთიდანვე მთლიანად ოპოზიციაზეა დამოკიდებული.
„თვითონაც ვერ ყალიბდებიან, ბოლოს და ბოლოს რა არის მათი მოთხოვნა. ჩვენ კარგად გვახსოვს, როცა რამდენიმე ოპოზიციურმა ლიდერმა გათქვა მათი შიდა საიდუმლო, რომ მათ არ უნდოდათ მოლაპარაკებები, ლაპარაკია „ნაციონალურ მოძრაობასა“ და კიდევ რამდენიმე პარტიაზე, რომ მათთვის მოლაპარაკებები იყო საბაბი, თორემ სინამდვილეში ყველა მოთხოვნაც რომ შესრულებულიყო, მაინც არ აპირებდნენ შემოსვლას. დღესაც კი, მას შემდეგ, რაც დიდი დრო გავიდა ამ პერიოდიდან, იგივე მდგომარეობაში არიან.
გამოვა ერთი პარტია და იტყვის, რომ პლებისციტი არის მათთვის მისაღები. გამოვა მიხეილ სააკაშვილი და იტყვის, ამას ვინც ამბობს, ის არის მოღალატე, ეს არის „ქართული ოცნების“ ან ბიძინა ივანიშვილის მიერ თავსმოხვეული აზრი. ჩამოყალიბდნენ, მართლა რა უნდათ?! თუ ლაპარაკობენ არჩევნების გაყალბებაზე, საგამოძიებო კომისიაზე უკეთესი შეთავაზება არ არსებობს და ამის შემდეგ, დავსხდეთ და ვილაპარაკოთ.
ნიკა მელიას დაკავებამდე ზუსტად იგივე მდგომარეობაში იყო მოლაპარაკებები რა მდგომარებაშიცაა მელიას დაკავების შემდეგ. ასე რომ, ამ მხრივ არაფერი შეცვლილა. რაც შეეხება ნიკა მელიას, მისი გამოშვება არის პირადად ნიკა მელიას ან ამ ოპოზიციური ადამიანების ხელში, რაც გააკეთეს ილიჩოვასა და მელაშვილის შემთხვევაში შეუძლიათ იმ გზით წავიდნენ ან ნებისმიერი გზით. ეს არის უმარტივესი თემა, მაგრამ მგონი, ყველაზე მეტად ვისაც არ უნდა ნიკა მელიას გარეთ ყოფნა, არის ის ადამიანი, ვინც დღეს პლებისციტის მიუღებლობაზე საუბრობს, ეს არის მიხეილ სააკაშვილი”, – განაცხადა სოზარ სუბარმა.