“როცა ხედავ, რომ შენს მეგობარს 20 კაცი ურტყამს, სცემს, ჩაფხუტს აგლეჯს, იქ უკვე შენ მინისტრიც აღარ გაინტერესებს, არც მისი მოადგილე და არც დეპარტამენტის ხელმძღვანელი”

როცა ხედავ, რომ შენს თვალწინ შენს მეგობარს 20 კაცი ურტყამს, სცემს, ჩაფხუტს აგლეჯს, რა თქმა უნდა, ღიზიანდები, იქ უკვე შენ მინისტრიც აღარ გაინტერესებს, არც მისი მოადგილე, არც შენი დეპარტამენტის ხელმძღვანელი, – ამის შესახებ შინაგან საქმეთა მინისტრმა ვახტანგ გომელაურმა პარლამენტის პლენაურ სხდომაზე განაცხადა და აქვე განმარტა, რომ 8 ნოემბერს ცესკო-სთან განვითარებული მოვლენებისას, ადგილზე მობილიზებულ სპეცსამსახურების თანამშრომლებს მაქსიმალურად მოკლე პერიოდში ცვლიდნენ, რათა იქ შეკრებილი აქტივისტების შეურაცხყოფისას წყობიდან არ გამოსულიყვნენ.

„რაც მოხდა ცესკო-ს შენობასთან, ღიად არ მითქვამს, მაგრამ უნდა ვთქვა, ნამდვილად გაუსაძლისი პირობები იყო, ისეთ შეურაცხყოფას აყენებდნენ პირდაპირ. უნდოდათ, რომ ამტყდარიყო ჩხუბიც, ცემა-ტყეპაც, ხელკეტების ცემა. ჩემი ორი მოადგილე იყო ადგილზე და ვუთხარი, რომ ბიჭებს ჩაეთვალათ, რომ მე მაგინებდნენ აქტივისტები და ვუთხარი, ვთხოვე, რომ არ განძრეულიყვნენ ბიჭები და სწრაფად ვცვლიდით წინა რიგებს, იმიტომ, რომ ერთ ადამიანს ნერვები ეშლება. ადამიანები ვართ ყველა. რაც მოხდა 20 ივნისსაც, როცა ხედავ, რომ შენს თვალწინ შენს მეგობარს 20 კაცი ურტყამს, სცემს, ჩაფხუტს აგლეჯს, რა თქმა უნდა, ღიზიანდები, იქ უკვე შენ მინისტრიც აღარ გაინტერესებს, არც მისი მოადგილე, არც შენი დეპარტამენტის ხელმძღვანელი. ვყოფილვარ მეც რიგითი სპეცრაზმელის როლში და იქ რომ შედიხარ, შენ წყვეტ. ძალიან ძნელია ნერვების მოთოკვა, ამიტომ წინა რიგებს ვცვლიდით ნამდვილად, ახლა ვამბობ პირველად ღიად, რომ ეს ადამიანები არ გაღიზიანებულიყვნენ, ხელი არ დაერტყათ და არ წასულიყო დაპირისპირება მაქსიმალურად,“- განაცხადა გომელაურმა.