ჩვენ უნდა ვიყოთ სხვებისთვის მაგალითი და ეს დარბაზი ნამდვილად არ იყო მაგალითი იმისა, თუ როგორ უნდა იქცეოდეს პარლამენტში ხალხის არჩეული დეპუტატი, – ამის შესახებ პარლამენტის თავმჯდომარემ „იმედის კვირას“ განუცხადა.
მან 18 ივლისის სხდომა გაიხსენა და შს მინისტრის ჩაშლილი მოსმენა.
მისი თქმით, პროტესტი უჩნდება ყველას და დეპუტატებს უფლება აქვთ, პროტესტი გამოხატონ. ამას მათ არავინ არ უკრძალავს, თუმცა, კუჭავა მიიჩნევს, რომ იმ დღეს პარლამენტის სხდომათა დარბაზში განვითარებული მოვლენები საზოგადოებისთვის კარგი მაგალითის მიმცემი არ იყო.
„ერთია, პროტესტი გამოხატო და მეორეა, მიზანმიმართულად სხდომა ჩაშალო. არ შეიძლება, არ აღვნიშნო, რომ ყველა ოპოზიციურ პარტიას ეს ნამდვილად არ ეხება. აქ იყვნენ სხვადასხვა პოლიტიკური ჯგუფის წარმომადგენლები, რომელთაც ნამდვილად ჰქონდათ სურვილი, მოესმინათ მინისტრისთვის. მათთან მქონდა კომუნიკაცია. ისინი ნამდვილად იყვნენ მომზადებული, დაესვათ კრიტიკული კითხვები.
შესვენება გამოვაცხადეთ, რადგან ფაქტობრივად, პირდაპირ ურთიერთ შეხებაც იყო და აურზაური დარბაზში. შესვენების დროს მე მოვისმინე, ჩემთვის რამდენიმე მნიშვნელოვანი კომენტარი „ნაციონალური მოძრაობის“ წარმომადგენლებისგან, რომ მათი სურვილი არ იყო, აქ კითხვები დაესვათ და პასუხები მიეღოთ. მათი სურვილი სხდომის ჩაშლა იყო.
როდესაც ვნახე, რომ ეს სიტუაცია არ წყნარდებოდა, გადაწყვეტილება მივიღე, რომელიც იმ მომენტისთვის აუცილებელი იყო. პირველ რიგში, უმნიშვნელოვანესია პარლამენტში ჩვენ სახე შევინარჩუნოთ. ეს არის ადგილი, სადაც თუ ჩვენ დეპუტატებს შორის ვერ ვახდენთ, კრიტიკული კითხვების დასმას, რომელსაც ხელოვნება უნდა და ეს სწორად უნდა გააკეთო, მაგრამ თუ ამას ვერ ახერხებ და პირდაპირ დესტრუქციაზე გადადიხარ, მათ შორის არა მხოლოდ სიტყვიერი, ფიზიკური და ასე შემდეგ, სამწუხაროა, როდესაც საზოგადოება ხედავს ამას და შემდეგ ჩვენ, პოლიტიკოსები ვითხოვთ საზოგადოებისგან ნაკლებ დაპირისპირებას. ჩვენ უნდა ვიყოთ სხვებისთვის მაგალითი და ეს დარბაზი ნამდვილად არ იყო მაგალითი იმისა, თუ როგორ უნდა იქცეოდეს ხალხის არჩეული დეპუტატი პარლამენტში“, – განაცხადა კახა კუჭავამ.