შერიგება, გარდა პოლიტიკური ლიდერებისა, რიგითი ადამიანის დონეზეც უნდა მოხდეს. შეიძლება ადამიანები უბრალოდ დაიღალონ ამდენი ბრძოლით ან ის თაობა წამოვიდეს, რომელსაც ერთმანეთის სისხლი არ დაუღვრია და ერთმანეთთან სერიოზული პრობლემები არ ჰქონია, – ამის შესახებ პარტია „გირჩის“ წევრმა ჰერმან საბომ ჟურნალისტებთან განაცხადა.
„შერიგება მარტივი რომ იყოს, აქამდე არაერთხელ მოვახერხებდით. მაგრამ იმის გამო, რომ ორივე დიდი პოლიტიკური მოთამაშე მეორე მხარის ზიზღითა და შურით საზრდოობს, ძალიან სკეპტიკურად ვუყურებთ ამ საკითხს. თუ მართლა ვინმეს შერიგება გულწრფელად უნდა, სიამოვნებით გავესაუბრებოდით მათ და გავიგებდით მეტს. შერიგება, გარდა პოლიტიკური ლიდერებისა, რიგითი ადამიანის დონეზეც უნდა მოხდეს. არ ვიცი რა პროცესებმა შეიძლება მიიყვანოს აქამდე ყველაფერი. შეიძლება ადამიანები უბრალოდ დაიღალონ ამდენი ბრძოლით ან მეორე, რომ ის თაობა წამოვიდეს, რომელსაც ერთმანეთის სისხლი არ დაუღვრია და ერთმანეთთან სერიოზული პრობლემები არ ჰქონია“, – აღნიშნა ჰერმან საბომ.
6 დეკემბერს, მიხეილ სააკაშვილის ოფიციალურ Facebook-გვერდზე გამოქვეყნდა მისი განცხადება, რომლითაც მმართველ გუნდს მიმართავს: „უახლოეს დღეებში ბრძოლა გამძაფრდება და არ გაჩერდება თქვენს დამარცხებამდე. ან თუ გონს მოეგებით და წამოხვალთ ეროვნულ შერიგებაზე, სანამ გვიან არაა, ეს ყველასთვის საუკეთესო გამოსავალია“.