„ლელოს“ ერთ-ერთმა ლიდერმა მამუკა ხაზარაძემ ტელეკომპანია „იმედთან“ ოთხდღიანი ლოდინის მიუხედავად კომენტარი არ გააკეთა, თუმცა დღეს საღამოს ტელეკომპანიასთან პირდაპირი ეთერის მოთხოვნით მივიდა.
„იმედის კვირის“ ავტორისა და საინფორმაციო სამსახურის ხელმძღვანელის, ირაკლი ჩიხლაძის თქმით, გადაცემის ეს ფორმატი არ ითვალისწინებს სტუმრების მოწვევასა და პირდაპირი ეთერის რეჟიმში ინტერვიუს ჩაწერას და ახლაც სთავაზობს მამუკა ხაზარაძეს, რომ სურვილის შემთხვევაში, უპასუხოს ჟურნალისტის შეკითხვებს და მისი კომენტარი გავა საინფორმაციო გამოშვებებსა და საჭიროების შემთხვევაში მომავალ კვირას „იმედის კვირაშიც“.
„ცოტა ხნის წინ, მამუკა ხაზარაძე მოვიდა „იმედის“ შენობასთან და ითხოვს პირდაპირ ეთერს. რეალურად ეს არის შოუ, რომელსაც ამ წუთებში საკუთარი მედიის წარმომადგენლებთან ერთად მამუკა ხაზარაძე ტელეკომპანია „იმედთან“ დგამს. ჩვენ ოთხი დღეა მას შევთავაზეთ, კონკრეტული სიუჟეტისთვის დაეფიქსირებინა საკუთარი პოზიცია, თუმცა, რატომღაც 4 დღის შემდეგ გაახსენდათ, რომ მათი ინტერვიუ და პოზიცია ამ სიუჟეტისთვის მნიშვნელოვანი იყო. დღის წესრიგი, რომელსაც ბატონი ხაზარაძე, გვთავაზობს, ჩვენთვის არაფერს ნიშნავს, აქ დღის წესრიგს ჩვენ ვთავაზობთ ჩვენს რესპონდენტებს და რა თქმა უნდა, ყველაზე რეიტინგული არხის ეთერი დაეთმობა მას, ვისაც ტელეკომპანია გადაწყვეტს. რაც შეეხება „იმედის კვირას“, ეს ფორმატი არ ითვალისწინებს სტუმრებსა და პირდაპირ ინტერვიუებს. შესაბამისად, ჩვენ ახლაც იგივე პოზიციაზე ვართ – თუ ბატონ ხაზარაძეს ექნება სურვილი გააკეთოს კომენტარი, უპასუხოს „იმედის“ ჟურნალისტის შეკითხვებს, მისი კომენტარი გავა საინფორმაციო გამოშვებებში და თუ საჭირო იქნება მომავალ კვირას „იმედის კვირაში“. „იმედის“ გარე პერიმეტრზე მამუკა ხაზარაძე ითხოვს პირდაპირ ეთერს გადაცემაში, რომელიც არ ითვალისწინებს სტუმრებს და ეს არის კვირის ანალიტიკური გადაცემა“, – განაცხადა „იმედის კვირის“ ავტორმა და წამყვანმა ირაკლი ჩიხლაძემ.
„იმედის კვირის“ სიუჟეტი ეხებოდა ხაზარაძე-ჯაფარიძე-წერეთლის საქმეზე სასამართლოს გადაწყვეტილებას. მამუკა ხაზარაძე, ბადრი ჯაფარიძე და ავთანდილ წერეთელი სასამართლომ დამნაშავედ ცნო, თუმცა, მოსამართლემ სამივე საქმეზე კვალიფიკაცია შეცვალა და ისინი ჯგუფურ თაღლითობაში ცნო დამნაშავედ. თითოეულ მათგანს 7 წლის ვადით შეეფარდა თავისუფლების აღკვეთა, თუმცა, მუხლის ხანდაზმულობის გამო, ისინი დანიშნული სასჯელისგან გათავისუფლდნენ.