ძალიან მალე მოქალაქეები მნიშვნელოვნად გაიაფებული მედიკამენტების შეძენას შეძლებენ. მთავრობის მეთაურის ინიციატივით, უკვე მეორე დღეა თურქეთის ფარმაცევტული ბაზარი იმპორტიორებისთვის სრულად გახსნილია.
დღეს „ქრონიკამ“ თვალსაჩინოებისთვის ერთგვარი ექსპერიმენტი ჩაატარა და წამლების შესაძენად თურქეთის საზღვარი გადაკვეთა. ყველაზე მოთხოვნად მედიკამენტებზე ფასის სხვაობა საკმაოდ დიდი აღმოჩნდა.
თურქეთსა და საქართველოში რომ მედიკამენტების ფასები რადიკალურად განსხვავდება, ეს არავისთვის წარმოადგენს სიახლეს, თუმცა „ქრონიკის“ ექსპერიმენტმა ეს თვალნათლივ აჩვენა.
„ქრონიკის“ გადამღებმა ჯგუფმა სხვადასხვა დაავადების სამკურნალო 8 მედიკამენტი თურქეთში, ქემალფაშაში 150 ლარად შეიძინა. იგივე მედიკამენტები რამდენიმე კილომეტრში, ბათუმში უკვე 490 ლარი ღირს. სავარაუდოდ, ეს რეალობა რამდენიმე კვირაში შეიცვლება, მას შემდეგ რაც ქართული ფარმაცევტული სივრცისთვის თურქული ბაზრის კარი გაიღო.