ნაძალადევის რაიონში, სანზონის N16 ა და ბ კორპუსის მიწისქვეშა კომუნიკაციების რეაბილიტაცია მიმდინარეობს. პროექტის ფარგლებში, სადარბაზოების სარდაფსა და ეზოში მილები 254 გრძივ მეტრზე ეწყობა, ასევე, მონტაჟდება შვიდი საკომუნიკაციო ჭა.
მიმდინარე სამუშაოებს ნაძალადევის რაიონის გამგებელი ირაკლი ანდღულაძე გაეცნო და ადგილობრივ მოსახლეობას შეხვდა.
„აქტიურად ვაგრძელებთ ამხანაგობების პროექტების დაფინანსებას. წყალარინების მოძველებული ქსელის გამო კორპუსის მოსახლეობას დისკომფორტი ექმნებოდა. აღნიშნული პროექტით გაუმართავ მიწისქვეშა კომუნიკაციებთან დაკავშირებული პრობლემები 48 ოჯახს მოუგვარდება“, – განაცხადა ირაკლი ანდღულაძემ.
წყალარინების ქსელის შეცვლის შემდეგ, გზის საფარი მოწესრიგდება. ინფრასტრუქტურული სამუშაოებისთვის ნაძალადევის რაიონის გამგეობამ ბიუჯეტიდან 54 885 ლარი გამოყო.