პროკურატურა, მართალია ზოგისთვის ნელა, მაგრამ დამაჯერებლად მიიწევს წინ იმ ნიშნულისკენ, რასაც ჰქვია სამართლიანობის აღდგენა, – ამის შესახებ საპარლამენტო უმრავლესობის წევრმა ნუკრი ქანთარიამ ”პალიტრანიუსის” გადაცემა ”360 გრადუსში” ე.წ. ფოტოგრაფების საქმის გახსნაზე საუბრისას განაცხადა.
”საზოგადოებამ ძალიან კარგად ვიცით, რომ სააკაშვილის, ადეიშვილისა თუ მერაბიშვილის გარეშე, ასეთი საქმეები თავისით არ შეიქმნებოდა, მაგრამ პროკურატურა ყველა ნორმის დაცვით მუშაობს და ამის დამტკიცებას დრო სჭირდება. ერთია, რომ ჩვენ ვიცით და ეჭვი არ გვეპარება, მეორეა, რომ ამას სჭირდება აუცილებლად მტკიცებულება და სასამართლოში ფაქტების გატანა”, – განაცხადა ქანთარიამ.
საპარლამენტო უმრავლესობის წევრის თქმით, ახლა ხელისუფლებაში რომ კვლავ ”ნაციონალური მოძრაობა” ყოფილიყო, შესაძლოა ამ საქმეს წერტილი ერთ კვირაში დასმოდა.
”ეს რომ ძველი დრო იყოს და წინა მთავრობა, მართლაც ალბათ ერთ კვირაში ყველაფერს წერტილს დაუსვამდა. გამოიყენებდა წამებას, შანტაჟს და რა საკვირველია რიგი დადგებოდა ადამიანების, რომლებიც აღიარებითი ჩვენებების მიცემას დაიწყებდნენ”, – აღნიშნა ქანთარიამ.
მთავარმა პროკურატურამ ე.წ. ფოტოგრაფების საქმე გახსნა. როგორც უწყებაში გამართულ ბრიფინგზე გახდა ცნობილი, პროკურატურამ ე.წ. ფოტორეპორტიორების საქმეზე ორი პირის მიმართ სისხლისსამართლებრივი დევნა დაიწყო. კერძოდ, საქართველოს მთავარი პროკურატურის სამართალწარმოების პროცესში ჩადენილი დანაშაულის გამოძიების დეპარტამენტის მიერ ე.წ. ფოტორეპორტიორების საქმეზე, ძალადობით და დაზარალებულის პირადი ღირსების შეურაცხყოფით განხორციელებული სამსახურებრივი მდგომარეობის გადამეტების ფაქტზე დაკავებულ იქნა საქართველოს შსს კონტრდაზვერვის დეპარტამენტის ქ.თბილისის ტერიტორიული სამმართველოს უფროსის ყოფილი მოადგილე დავით დევნოზაშვილი, ხოლო სასჯელაღსრულების დაწესებულების N8 საპყრობილის ყოფილი დირექტორის ალექსანდრე მუხაძის მიმართ გამოტანილ იქნა დადგენილება მისი ბრალდების შესახებ.
ამავდროულად, პროკურატურის მიერ მიღებულია გადაწყვეტილება ფოტორეპორტიორების: გიორგი აბდალაძის, ზურაბ ქურციკიძის, ირაკლი და ნათელა გედენიძეების მიმართ გამოტანილი გამამტყუნებელი განაჩენების გადასინჯვის თაობაზე და პროკურატურა მათ მიმართ თბილისის სააპელაციო სასამართლოში გამამართლებელი განაჩენების დადგომას მოითხოვს.