უკრაინამ რუსეთის აგრესიის წინააღმდეგ ბრძოლაში უნდა გაიმარჯვოს, – ამის შესახებ დიდი ბრიტანეთის პრემიერ-მინისტრმა, ბორის ჯონსონმა თემთა პალატას განუცხადა.
„ჩვენი უშუალო პრიორიტეტია, შევუერთდეთ ჩვენს მოკავშირეებს, რათა უკრაინამ პუტინის აგრესიის წინააღმდეგ მამაცურ ბრძოლაში გაიმარჯვოს“, – განაცხადა ბორის ჯონსონმა.
მისი თქმით, მადრიდში, ნატოს სამიტმა ალიანსის ერთიანობისა და ერთსულოვნების ყველა მოლოდინს გადააჭარბა, რადგან ნატო მხარს დაუჭერს უკრაინას მანამ, სანამ საჭირო იქნება.
„ყველას გვესმის, რომ თუ პუტინს უკრაინაში არ შევაჩერებთ, ის იპოვის ახალ სამიზნეებს თავისი რევანშისტული თავდასხმებისთვის. ჩვენ არ ვიცავთ რაიმე აბსტრაქტულ იდეალს, არამედ მშვიდობიანი სამყაროს პირველ პრინციპს, რომელიც არის ის, რომ დიდ და ძლიერ ქვეყნებს თავისი მეზობლების დანაწევრების უფლება არ აქვთ. თუ ეს დაშვებული იქნება, მაშინ არც ერთი ერი არ იქნება უსაფრთხოდ. უკრაინას უნდა ჰქონდეს ძალა, რომ დაასრულოს ეს ომი იმ პირობებით, რაც პრეზიდენტმა ზელენსკიმ აღწერა“, – აღნიშნა ბორის ჯონსონმა.