რუსმა ოკუპანტებმა უკრაინაში, დონეცკის ოლქში, ქალაქ ტორეცკში საზოგადოებრივი ტრანსპორტის გაჩერება დაბომბეს. ამის შედეგად, 8 ადამიანი დაიღუპა, 4 პირი კი დაიჭრა. დაჭრილებს შორის 3 ბავშვია. რუსებმა გაჩერებაზე იერიში დაახლოებით დილის 11 საათზე მიიტანეს, როდესაც ტრანსპორტს ბევრი ადამიანი ელოდებოდა. ინფორმაციას დონეცკის რეგიონული სამხედრო ადმინისტრაციის ხელმძღვანელი, პავლო კირილენკო ავრცელებს.
“გარდა ამისა, რუსების იერიშების შედეგად, დაზიანდა ეკლესია და დაშავდა შიგნით მყოფი მღვდელი. აგრეთვე, დაზიანდა მრავალსართულიანი შენობა. რუსი ოკუპანტები ყოველდღე კლავენ და ჭრიან მშვიდობიან მოქალაქეებს. ვინც ჯერ კიდევ დონეცკის ოლქში ჩერდებით, თავს სასიკვდილო საფრთხეში იგდებთ. დროულად მოახდინეთ ევაკუაცია” – წერს კირილენკო სოციალურ ქსელში.
19 აპრილის დადგომასთან ერთად, რუსეთის სამხედრო ძალებმა დონბასში, აღმოსავლეთ უკრაინაში ინტენსიური თავდასხმები წამოიწყეს და ომის ახალ ეტაპზე გადავიდნენ.
როგორც უკრაინის პრეზიდენტი, ვოლოდიმირ ზელენსკი ამბობს, დაწყებულია ომი დონბასისთვის.