ნარსიას დაზიანებები ჰქონდა სახეზე, დაკავების დროს მიიღო. კაცს ჰქონდა ასხმული ბომბები და ხელყუმბარები, დააკავეს, დააწვინეს, არ ემორჩილებოდა და მიიღო დაზიანებები, – ამის შესახებ საქართველოს შინაგან საქმეთა მინისტრმა ვახტანგ გომელაურმა ქუთაისში „საქართველოს ბანკზე“ თავდამსხმელ გრიგოლ ნარსიასთან დაკავშირებით განაცხადა.
როგორც მინისტრმა აღნიშნა, გრიგოლ ნარსიას შეუძლია იჩივლოს თუ ის მიიჩნევს, რომ პოლიციის მხრიდან ძალის გადამეტება იყო და ამას სახელმწიფო ინსპექტორის სამსახური და პროკურატურა შეისწავლის.
„მე ნამდვილად არ მინახავს ეს ფოტო. როდესაც ავედით დეპარტამენტში ამ ადამიანს დაზიანებები ჰქონდა სახეზე. შევედი, ვესაუბრე. რაზე ვესაუბრე მაგას არ ვიტყვი ახლა, არ მოვყვები. დაკავების დროს ჰქონდა მიღებული დაზიანებები. არის სამსახურები და თუ ის ადამიანი ჩივის, რომ მერე სცემეს, ან სადმე სცემეს, ან ზეწოლა იყო, იჩივლებს და სხვა სამსახურები – სახელმწიფო ინსპექტორი, პროკურატურა გამოიძიებენ თუ გადაამეტეს უფლებები პოლიციელებმა“, – განაცხადა გომელაურმა.