ნაძალადევის რაიონში, სანზონის N1 კორპუსის მიმდებარედ სანიაღვრე ქსელის მოწყობა მიმდინარეობს. პროექტის ფარგლებში, ახალი მილები 220 გრძივ მეტრზე ეწყობა, ასევე, 10 ჭა და კიუვეტები მონტაჟდება. სანიაღვრე სისტემის მოწყობამდე კორპუსის წყალარინების ქსელი შეიცვალა.
მიმდინარე სამუშაოებს ნაძალადევის რაიონის გამგებელი ირაკლი ანდღულაძე და თბილისის საკრებულოს მაჟორიტარი დეპუტატი ირაკლი ხელაძე გაეცნენ. გამგებელი და საკრებულოს წევრი ადგილობრივ მოსახლეობასაც შეხვდნენ.
„აღნიშნულ კორპუსში 226 ოჯახი ცხოვრობს. სანიაღვრე სისტემის მოწყობის შემდეგ ასფალტის საფარი დაიგება და კორპუსის ეზო სრულად მოწესრიგდება, რის შედეგადაც ადგილობრივი მოსახლეობის ინფრასტრუქტურული პრობლემები სრულად აღმოიფხვრება“, – განაცხადა ირაკლი ანდღულაძემ.
მიმდინარე სამუშაოების ღირებულება 105 264 ლარს შეადგენს. პროექტი ნაძალადევის რაიონის გამგეობის დაფინანსებით ხორციელდება.