“ადამიანი ამას არ გააკეთებდა….არაადამიანური საქციელია” – ამბობს, ახალქალაქის, კუმურდოსა და კარის მიტროპოლიტი, მეუფე ნიკოლოზი ხაშურის დედათა მონასტერში მომხდარ ძალადობაზე.
“შაბათის მთავარის” ეთერში საუბრისას, მან აღნიშნა, რომ ასეთ დროს, ერთადერთი რამ, რაც მათ შეუძლიათ მხოლოდ ლოცვაა.
“რა ვიცი, რა უნდა ვთქვა, მე ასეთი რამ არ გამიგია საერთოდ. შეიძლება გამიგია ძველად, ოდესღაც, თუმცა ჩვენს დროში, თანამედროვე დროში ასეთი ვანდალიზმი, მე ვფიქრობ, რომ ადამიანი ამას არ გააკეთებდა, რაღაც ექნებოდა ან დალეული, ან რა ვიცი…არაადამიანური საქციელია, ყოველგვარ ჰუმანურ ფარგლებს სცდება, ამას ახსნა არ აქვს ვერ გეტყვით ვერაფერს. ჩვენ ამ შემთხვევაში ძალადობის მსხვერპლი ვართ, ეკლესიას დაესნენ თავს… მე ასე ვფიქრობ, რომ ასეთი რაღაც მოხდა, რომ მონაზონი, რომ იყო არ ჩააგდეს, არ გაუწიეს ანგარიში და თავის არეული გონებით, ნორმალური ადამიანი ხომ ასე არ მოიქცეოდა არ ვიცი…საშინელებაა…. ჩვენ ასეთ დროს, ერთადერთი რაც შეგვიძლია ვილოცოთ…რა შეგვიძლია, იქ პოლიციას ხომ არ დავიყენებთ ყველა მონასტერში. ეს ხდებოდა ისტორიულადაც არბევდნენ…” – ამბობს მეუფე ნიკოლოზი
მომხდართან დაკავშირებით, საქართველოს საპატრიარქოს ოფიციალური კომენტარი ამ დრომდე არ გაუკეთებია.
შეგახსენებთ, რომ ხაშურის დედათა მონასტერში თავდასხმა გუშინ, 25 ნოემბერს მოხდა. ორმა უცნობმა პირმა 70 წლამდე მონაზონს ფიზიკური დაზიანებები მიაყენა და მასზე სექსუალურად იძალადა. ქალი მონასტერში, სავარაუდოდ, მარტო იმყოფებოდა.
მომხდარი თავდასხმის ფაქტზე დაკავებულებიდან ერთი ადგილობრივი, მეორე კი მასთან სტუმრად მყოფი პირი იყო. შსს-მ ისინი ჯგუფური ყაჩაღობისა და გაუპატიურების მუხლებით დააკავა. ამჟამად ორივე დაკავებული წინასწარი მოთავსების იზოლატორში იმყოფება და ბრალის ოფიციალურ წარდგენას ელოდება.