„ნაციონალურ მოძრაობას“ საგამოძიებო კომისიის შექმნა მოდურ სიტყვად ექცა, – ასე უპასუხა პარლამენტის თავდაცვისა და უსაფრთხოების კომიტეტის თავმჯდომარემ ირაკლი სესიაშვილმა „ნაციონალური მოძრაობის“ მოთხოვნას, რომ მაღალი იერარქიის სასულიერო პირის მოწამვლის დაგეგმვის საქმეზე სპეციალური ჯგუფი შეიქმნას.
მისი თქმით, ასეთი ჯგუფის შექმნა ამ საქმეზე არასწორია.
„არ შეიძლება ეს საკითხი პოლიტიკურ ჭრილში გადავიტანოთ. ვარაუდები გამოვთქვათ და ერთმანეთი დავძაბოთ. სწორედ აქ უნდა გამოვიჩინოთ შინაგანი რწმენა და სურვილი, რომ გამოძიებას დავაცადოთ საგამოძიებო პროცესის დამთავრება და არა ის, რომ ეს ვიღაცამ პოლიტიკურ ჭრილში გამოიყენოს. რაც აბსოლუტურად მიუღებელია. „ნაციონალურ მოძრაობას“ მოდურ სიტყვად ექცა საგამოძიებო კომისიის შექმნა“, – განაცხადა სესიაშვილმა.
მისივე თქმით, სერიოზული დანაშაული აღიკვეთა.
“საუბარი არ არის მარტივ კრიმინალზე. ის შესაძლოა მძიმე შედეგების გამომწვევი ყოფილიყო. ჩვენთვის ყველა სასულიერო პირი არის ძალიან ძვირფასი და დაკავშირებულია ჩვენს სულიერ სამყაროსთან. ამ მხრივ, სამართალდამცველებმა და გარკვეულმა მოქალაქეებმა ძალიან კარგად იმუშავეს და მადლობა ღმერთს, რომ ეს ტრაგედია თავიდან ავიცილეთ. თემა არის ძალიან მგრძნობიარე. გამოძიება მიმდინარეობს, ყველა დაინტერესებული ვართ, სიმართლე გაირკვეს, ამიტომ ნებისმიერი ვარაუდებისგან, ვერსიებისგან ყველას თავის შეკავებისკენ მოვუწოდებ. უნდა შევინარჩუნოთ ერთიანობა, რათა საქმე მივიყვანოთ ბოლომდე და ყველა კითხვას გაეცეს პასუხი“, – განაცხადა სესიაშვილმა.
მთავარი პროკურატურის ინფორმაციით, დეკანოზი გიორგი მამალაძე მკვლელობის მომზადების ფაქტზე დააკავეს. გამოძიება დაიწყო 2017 წლის 2 თებერვალს ერთ-ერთი მოქალაქის განცხადების საფუძველზე, რომელმაც მომართა საქართველოს პროკურატურას და მიუთითა, რომ მისმა ნაცნობმა მამა გიორგი მამალაძემ სთხოვა სიცოცხლისთვის საშიში შხამიანი ნივთიერების – ციანიდის მოძიებაში დახმარება, რომლის გამოყენებითაც ამ უკანასკნელს, როგორც შეხვედრისას განმცხადებელმა გაარკვია, უნდა მოეხდინა მაღალი იერარქიის სასულიერო პირის სიცოცხლის ხელყოფა. პროკურატურაში არ აკონკრეტებენ, იყო თუ არა ეს მაღალი იერარქიის სასულიერო პირი სრულიად საქართველოს კათოლიკოს- პატრიარქი.