თუ კონკრეტულ კანდიდატებთან ხალხი არ გამოდის შეხვედრაზე, ეს “ქართული ოცნების” და ჩემი პრობლემა ნამდვილად არ არის, – ამის შესახებ “ქართული ოცნების” თბილისის მერობის კანდიდატმა კახა კალაძემ “საერთაშორისო გამჭვირვალობა-საქართველოს” დღევანდელ ანგარიშთან დაკავშირებით განაცხადა, სადაც საუბარი იყო წინასაარჩევნოდ ადმინისტრაციული რესურსის გამოყენებაზე.
როგორც კახა კალაძემ აღნიშნა, კონკრეტული არასამთავრობო ორგანიზაციის სახით, სიცრუის პროპაგანდისტული მანქანაა ჩართული.
“ეს არის ძალიან დიდი სიცრუე, ტყუილი, სამწუხაროა რომ ეს სიცრუის, პროპაგანდისტული მანქანა არის ჩართული იმ კონკრეტული არასამთავრობოების სახით, რომლებზეც თქვენ საუბრობდით. ძალიან სამწუხაროა, რადგან ეს ყველაფერი ჩვენ 2012 წელს ჩავაბარეთ წარსულს. ყველას კარგად გვახსოვს, რა მდგომარეობა იყო 2012 წლამდე, როგორი მიდგომები იყო, როგორი დამოკიდებულება იყო, განსხვავებული პოლიტიკური აზრის მქონე ადამიანების მიმართ. დღეს საბედნიეროდ გვაქვს აბსოლუტურად განსხვავებული რეალობა. ყველა პარტიას და კანდიდატს აქვს იმის შესაძლებლობა, რომ თავისუფალ გარემოში აწარმოოს საარჩევნო კამპანია. თუ კონკრეტულ კანდიდატებთან ხალხი არ გამოდის შეხვედრაზე, ეს “ქართული ოცნების” და კახი კალაძის პრობლება ნამდვილად არ არის. რაც შეეხება ცრუ ბრალდებებს, უბრალოდ თავს შევიკავებდი პასუხი გავცე ამ ყველაფერს”, – აღნიშნა კახა კალაძემ.