ესპანეთის შსს-ში განმარტავენ, თუ რა პირობებში მოუწევს პატიმრობაში ყოფნა კატალონიის ყოფილ ლიდერს კარლეს პუჩდემონს მადრიდში მისი ექსტრადიციის შემთხვევაში. ამის შესახებ კატალონიური გამოცემა Vanguardia წერს.
დღეს ბრიუსელის სასამართლო ესპანეთისთვის პუჩდემონისა და კატალონიის მთავრობის სხვა ყოფილი წევრების გადაცემის საკითხზე იმსჯელებს.
გამოცემის ინფორმაციით, ესპანური პენიტენციური სისტემის მოწყობის შესახებ კითხვის საპასუხოდ ესპანეთის შსს-მ ბელგიას 15-გვერდიანი დოკუმენტი გაუგზავნა.
უწყებაში აღნიშნავენ, რომ ექსტრადიციის შემთხვევაში, პუჩდემონს „ესტრემერას“ ციხეში მოათავსებენ, სადაც ამჟამად კატალონიის მთავრობის სხვა ყოფილი წევრები იმყოფებიან. სხვა პატიმრების მხრიდან შესაძლო თავდასხმის პრევენციის მიზნით კატალონიის ყოფილი ლიდერი მუდმივი დაკვირვების ქვეშ იქნება. გარდა ამისა, ესპანეთის შსს-ში აცხადებენ, რომ სამარტოო საკანსა და სხვა თანაგუნდელებთან ერთად ყოფნას შორის არჩევანს თავად პუჩდემონი გააკეთებს.
3 ნოემბერს, ესპანურმა სასამართლომ პუჩდემონისა და ბრიუსელში მყოფი კატალონიის მთავრობის სხვა ყოფილი წევრების დაკავების ორდერი გასცა. მათ აჯანყების ორგანიზება, ამბოხება, სახელმწიფო სახსრების გაფლანგვა, სამსახურეობრივი მდგომარეობის ბოროტად გამოყენება და ხელისუფლებისადმი დაუმორჩილებლობა ბრალდებათ. საერთო ჯამში, ამ დანაშაულისთვის მათ 50-წლიანი პატიმრობა ემუქრებათ.