ამერიკის შეერთებული შტატების სახელმწიფო დეპარტამენტმა საქართველო-აშშ-ის სტრატეგიული პარტნიორობის ქარტიის კომისიის დემოკრატიის სამუშაო ჯგუფის შეხვედრას უმასპინძლა.
„განვიხილეთ ყველაზე მნიშვნელოვანი საკითხები, რომელიც ჩვენი ქვეყნის დემოკრატიულ განვითარებას უკავშირდება. პროგრესი, რომელიც საქართველოს აქვს დემოკრატიის, ადამიანის უფლებების და კანონის უზენაესობის მიმართულებით, დადებითად ფასდება. ინტერესი საქართველოს პარლამენტის, საპარლამენტო საქმიანობის და ზედამხედველობის მიმართ მაღალია და ამ მიმართულებით აშშ-ს მხრიდან მხარდაჭერა გაიზრდება. შინაგან საქმეთა სამინისტროს რეაგირება თბილისში განვითარებულ მოვლენებთან მიმართებაში თანაზომიერად ჩაითვალა და პოზიტიურად იყო შეფასებული“, – განაცხადა საპარლამენტო უმრავლესობის ლიდერმა, არჩილ თალაკვაძემ.
შეხვედრაზე მხარეებმა პარტნიორობის გაღრმავების მიმართულებით მთავრობების სტრატეგია და გეგმები განიხილეს, სადაც საქართველოში დემოკრატიული პროცესების განვითარება დადებითად შეფასდა.
შეხვედრაში მონაწილეობა მიიღეს საქართველოსა და აშშ-ის სხვადასხვა სახელმწიფო უწყების წარმომადგენლებმა.
შეხვედრაზე საქართველოს მხარეს წარმოადგენდნენ საპარლამენტო უმრავლესობის ლიდერი, არჩილ თალაკვაძე, იუსტიციის მინისტრის მოადგილე, ალექსანდრე ბარამიძე და საგარეო საქმეთა მინისტრის მოადგილე დავით ზალკალიანი. აშშ-ის მხრიდან შეხვედრას უმასპინძლეს USAID-ის ევროპისა და ევრაზიის პროგრამის ადმინისტრატორის მოადგილემ ბროკ ბიერმანმა, სახელმწიფო მდივნის თანაშემწის მოადგილემ ბრიჯიტ ბრინკმა და აშშ-ის სახელმწიფო დეპარტამენტის დემოკრატიისა და ადამიანის უფლებების ბიუროს უფროსმა სპეციალისტმა მაიკლ კოზაკმა.