კობა დავითაშვილმა, სააკაშვილ-მერაბიშვილის წინააღმდეგ პროკურატურას მიმართა

ყოფილმა დეპუტატმა კობა დავითაშვილმა, ექსპრეზიდენტ მიხეილ სააკაშვილისა და ყოფილი პრემიერის ვანო მერაბიშვილის წინააღმდეგ საქმის აღძვრის მოთხოვნით, პროკურატურას მიმართა.
„მოვითხოვე მიხეილ სააკაშვილისა და მერაბიშვილის მიმართ გამოძიება დაიწყოს მათი მხრიდან ხელისუფლების ბოროტად გამოყენების ფაქტზე, რაც პრაქტიკულად, მან აღიარა „რუსთავი 2“-ის ეთერში, როდესაც გაანდო საზოგადოებას, რომ ის ფარული ჩანაწერი, რომლის გაკეთებაც აკრძალული იყო პარლამენტის წევრის მიმართ, კანონის თანახმად, განხორციელდა მასთან შეთანხმებით მერაბიშვილის მიერ, რომელმაც ახარა სააკაშვილს, რომ დავითაშვილს პოლიტიკურ გვამად აქცევდნენ. მინდა, ნიკა გვარამიას მადლობა გადავუხადო. მან მრავალი წლის დაგვიანებით გაიხსენა, რომ ოდესღაც პროკურორის მოადგილე იყო და ეთერში დაკითხა მიხეილ სააკაშვილი. ჩემს მიმართ იმდენი უბედურება მოხდა, ერთმანეთში ერევა ყველას. სამი თავდასხმა, ერთი მკვლელობის მცდელობა. ამაზე არ აღძრულა საქმე. მაშინ ეს ყველაფერი გაფორმდა, როგორც სუფრის წევრის პირადი მასალა, რომელმაც მიაწოდა მედიას ჩანაწერი. ეს ადამიანი ავარიაში გარდაიცვალა. მე ამ გარემოებების გამოძიებასაც მოვითხოვ. ვფიქრობ, მოწმე სააკაშვილის ხელისუფლებამ მოიშორა. ვითხოვ გამოძიებას იმ საქმეზე, რაც აქამდე არ ყოფილა. მაშინ მოქმედი „ოპერატიულ-სამძებრო საქმიანობის შესახებ“ კანონის მიხედვით არ შეიძლებოდა ჩანაწერის მომზადება. მათ კონფიდენტის მეშვეობით გაავრცელეს „რუსთავი 2“-ის ეთერში, ჩემი პოლიტიკური მკვლელობის მიზნით. ეს უკანონო მიყურადება იყო“, – განაცხადა კობა დავითაშვილმა.
ცნობისთვის, საქმე ეხება კობა დავითაშვილის წინააღმდეგ 2006 წელს ფარულად მომზადებულ ჩანაწერს, რომელშიც როგორც კობა დავითაშვილი აცხადებს, კონფიდენტი, გარკვეული თანხის სანაცვლოდ, მას საპარლამენტო სიაში შეყვანას ჰპირდებოდა.