საქართველოს საპატრიარქო განცხადებას ავრცელებს, რომელშიც “ქართველი ხალხის ეროვნულ ყრილობას“ ემიჯნება. ყრილობის მონაწილეები ვადამდელი არჩევნების მოთხოვნას აპირებენ. საპატრიარქო უარყოფს გავრცელებულ ინფორმაციას იმის შესახებ, რომ ყრილობა მიტროპოლიტ იობის (აქიაშვილი) კურთხევით იმართება.
“ეს არის პოლიტიკური განაცხადი, რისი უფლებაც საზოგადოებას აქვს, მაგრამ შევნიშნავთ, რომ ვრცელდება არასწორი ინფორმაცია იმის შესახებ, თითქოს ყრილობა იმართება მიტროპოლიტ იობის (აქიაშვილი) კურთხევით, რასაც მეუფე უარყოფს. ასევე გაკეთდა განაცხადი ამ ღონისძიებასთან მიმართებაში კათოლიკოს-პატრიარქის ინფორმირებულობასთან დაკავშირებით, რაც რეალობას საერთოდ არ შეესაბამება. შეკრების მიზნებსა და გეგმებზე როგორც საზოგადოებისთვის, ისე ჩვენთვის ა.წ. 2 ივლისს გახდა ცნობილი და, ბუნებრივია, მას ვემიჯნებით.
კათოლიკოს-პატრიარქი და საქართველოს საპატრიარქო პოლიტიკური ხასიათის ამგვარ ღონისძიებებთან დაკავშირებული ვერ იქნება. ეს არის საერო პირთა საქმე და მათი გადასაწყვეტი, მიიღონ მასში მონაწილეობა თუ არა“, – წერია საპატრიარქოს განცხადებაში.
ყრილობა 6 ივლისს სპორტის სასახლეში გაიმართება. ყრილობის მონაწილეები ვადამდელი საპარლამენტო და საპრეზიდენტო არჩევნების დანიშვნას მოითხოვენ.