“ბახტაძეს თავისი ახალგაზრდობით, მნიშვნელოვანი როლის შესრულება შეუძლია. მე პოზიტიური მოლოდინით ვუყურებ“

მამუკა ბახტაძეს თავისი ახალგაზრდობით, ახალგაზრდობის როლის გააზრებით, მნიშვნელოვანი როლის შესრულება შეუძლია, – ამის შესახებ პოლიტოლოგმა ხათუნა ლაგაზიძემ მედიაჰოლდინგ „კვირას“ პრესკლუბში გამართულ პრესკონფერენციაზე განაცხადა.
ლაგაზიძე სამთავრობო ცვლილებებს გამოეხმაურა.
„ის, რასაც ოპოზიცია მამუკა ბახტაძის მთავარ ნაკლად მიიჩნევს – მის ახალგაზრდობას, მე ვთვლი, რომ მისი მთავარი პლუსია, სწორედ ახალგაზრდობის გამო, მას შეუძლია, ითამაშოს ფუნდამენტურად მნიშვნელოვანი როლი, ახალი თაობის შემომყვანის როლი ქართულ პოლიტიკაში. პრემიერად წარდგენის დღესვე, ძალიან საინტერესო მესიჯი ჰქონდა, სამსიტყვიანი, მაგრამ ძალიან ტევადი – განათლება, ინოვაცია, ახალგაზრდობა. თუ ის ამას რეალურად პრიორიტეტად დასახავს და ამ მესიჯს რეალობად აქცევს, ასეთ შემთხვევაში, შეიძლება ვთქვათ, რომ ის იქნება წარმატებული პრემიერი, იმიტომ, რომ მას მარტივად შეუძლია შექმნას ტექნოლოგიური საქართველო. როცა ჩვენ ტექნოლოგიებსა და ინოვაციებზე ვსაუბრობთ, ასევე განათლების რეფორმის სასიცოცხლო აუცილებლობაზე, რა თქმა უნდა, წინა პლანზე გამოდის ახალი თაობა. როგორც ჩანს, პოლიტიკურმა პარტიებმა თავიანთი არსებობის ვადა ამოწურეს, იმიტომ, რომ თვითგანახლების რესურსი არ ჩაერთოთ. ბახტაძეს თავისი ახალგაზრდობით, ახალგაზრდობის როლის გააზრებით, მნიშვნელოვანი როლის შესრულება შეუძლია. ასე რომ, რა განცხადებებითაც დაიწყო , ისევე როგორც მის საქმიანობას ფინანსთა მინისტრის პოსტზე, მე პოზიტიური მოლოდინით ვუყურებ“- განაცხადა ლაგაზიძემ.
რაც შეეხება სამთავრობო სტრუქტურულ ცვლილებებს, პოლიტოლოგის თქმით, ესაა რეფორმა რეფორმისთვის.
„რაც შეეხება მცირე მთავრობის კონცეფციას, მრჩება შთაბეჭდილება, რომ ბოლომდე გააზრებული არ არის ეს ცვლილებები, იმიტომ, რომ ამას აზრი ექნებოდა იმ შემთხვევაში, თუ ეს დაზოგავდა საბიუჯეტო სახსრებს. როცა ვისმენთ, რომ, თურმე, არცერთი ადამიანი თანამდებობას არ დატოვებს, მაშინ რა აზრი ჰქონდა? გამოდის, სამინისტროების დასახელები შეირწყა მხოლოდ და 3, თუ 4 მინისტრი გავისტუმრეთ. ამისთვის ღირდა რეფორმის ჩატარება? მრჩება შთაბეჭდილება, რომ ეს რეფორმა ტარდება იმისთვის, რომ რაღაცა ქმედების და აქტივობის იმიტაცია შეიქმნას, ეს არის რეფორმა რეფორმისთვის“- განაცხადა ლაგაზიძემ.