ოკუპირებულ სამხრეთ ოსეთთან დე ფაქტო საზღვარი 27 აგვისტოს, დილის 06:00 საათიდან გაიხსნება. ამის შესახებ განცხადება დე ფაქტო უშიშროების კომიტეტმა გაავრცელა.
სამხრეთ ოსეთის დეფაქტო ხელისუფლებამ საქართველოსთან ე.წ. საზღვარი სამი დღით ჩაკეტა. ამის მიზეზი ე.წ. დამოუკიდებლობის აღიარების 10 წლისთავი და მასთან დაკავშირებული ღონისძიებებია.
დღესვე საქართველოს ოკუპირებული რეგიონების აფხაზეთისა და სამხრეთ ოსეთის დეფაქტო პრეზიდენტებმა ერთმანეთს ე.წ. დამოუკიდებლობის წლისთავი მიულოცეს. ამასთან, ცნობილია, რომ რუსეთის პრეზიდენტი ცხინვალში 26 აგვისტოს დაგეგმილ „სადღესასწაულო“ ღონისძიებებზე დასასწრებად არ ჩავა.
ცოტა ხნის წინ ოფიციალურმა თბილისმა განცხადება გაავრცელა. საქართველოს საგარეო საქმეთა სამინისტროს ცნობით, ადრე თუ გვიან, რუსეთის ფედერაციას მოუწევს, შეცვალოს 2008 წელს მიღებული უკანონო გადაწყვეტილება საქართველოს განუყოფელი რეგიონების ე.წ. დამოუკიდებლობის აღიარების შესახებ და ჩვენი ქვეყნის ტერიტორიების დეოკუპაცია.
2008 წლის 26 აგვისტოს რუსეთის მაშინდელმა პრეზიდენტმა დიმიტრი მედვედევმა საქართველოს ოკუპირებული ტერიტორიების სამხრეთ ოსეთისა და აფხაზეთის ე.წ. დამოუკიდებლობა აღიარა.