ბატონო ოთარ, თქვენ რაც წაიკითხეთ, ამისთვის მარტივად შეგეძლოთ დაგერქვათ „პოლიტიკური რევანშის მცდელობის თავი,“ – ამის შესახებ ხორავას ქუჩაზე მომხდარი მკვლელობის შემსწავლელი საქართველოს პარლამენტის დროებითი საგამოძიებო კომისიის სხდომაზე კომისიის წევრმა ანრი ოხანაშვილმა ოთარ კახიძის რეკომენდაციის შემდეგ განაცხადა.
„ბატონო ოთარ, თქვენ რაც წაიკითხეთ, ამისთვის მარტივად შეგეძლოთ დაგერქვათ „პოლიტიკური რევანშის მცდელობის თავი“. იმდენად აბსურდული საკითხები წამოსწიეთ ახლა თქვენ, რომ არც კი ვიცი, ამ საკითხებზე ღირს თუ არა მსჯელობა. მე მეგონა, რომ უფრო მეტი სამართლებრივი საკითხებით იქნებოდა გაჯერებული თქვენი დასკვნა.
სოსო თოფურიძე ატარებდა ხოლმე მსგავს დამზაფრავ ბრიფინგებს, რომ ხალხი დაეშინებინათ. რაც ოთარ კახიძემ წაიკითხა, ასეთი შთაბეჭდილება შემექმნა ერთი-ერთში. პარლამენტის წევრები ვართ და არ მგონია, პარლამენტის წევრის კომპეტენცია იყოს ამ სტილში რევანშის წყურვილი ხალხის დაზაფვრისთვის. გააცნობიერეთ, რომ თქვენ ამის კომპეტენცია არ გაქვთ და ამ თავს შეგიძლიათ დაარქვათ „პოლიტიკური რევანშის მცდელობის თავი“. ის აბსოლუტურად დაცლილია სამართლებრივი საკითხებისგან.
თუ კონკრეტულ სამართლებრივ საკითხებზე საუბრობთ, მოახდინეთ სრული ციტატა, კონკრეტულ პირთან მიმართებაში რომელ არაჯეროვან და არაეფექტურ კონტროლზეა საუბარი,“ – განაცხადა ანრი ოხანაშვილმა.