თბილისში, ქართული სახვითი ხელოვნების მუზეუმი გაიხსნა.
ღონისძიებას თბილისის მერი, მთავრობის წევრები, პოლიტიკოსები, ასევე კულტურისა და ხელოვნების სფეროს წარმომადგენლები ესწრებოდნენ.
სტუმრებს მუზეუმის დამფუძნებლები გია ჯოხთაბერიძე და მანანა შევარდნაძე მსპინძლობდნენ, რომლებიც სამუზეუმო ექსპონატებს წლების მანძილზე საოჯახო კერძო კოლექციაში აგროვებდნენ.
მუზეუმი რუსთაველის გამზირზე, იმ ადგილას აშენდა, სადაც თავის დროზე მხატვრის სახლი იყო განთავსებული.
“როგორც დედაქალაქის მერი, კიდევ ერთხელ აღვნიშნავ, რომ ნებისმიერი ევროპული ქვეყნის დედაქალაქი ინატრებდა ასეთ სივრცეს და გარემოს. ახალგაზრდა თაობებსაც მიეცემა საშუალება, განვითარდნენ და ეს ნამდვილად მიხარია. მინდა მადლობა გადავუხადო გია ჯოხთაბერიძეს და მის ოჯახს ამ ყველაფრისთვის.
მუზეუმში მისი დამფუძნებლების, გია ჯოხთაბერიძის და მანანა შევარდნაძის ოჯახის სურათების კერძო კოლექცია გამოიფინა, რომელიც 1945 წლიდან დღემდე, 80-მდე მხატვრის 3500 ხელოვნების ნიმუშს აერთიანებს.
საგამოფენო სივრცე თანამედროვე სტანდარტების შესაბამისია. მუზეუმში არსებულ კოლექციას დროდადრო ახალი ნამუშევრები შეემატება და მუდმივი ექსპოზიციის გარდა, დროებითი გამოფენებიც მოეწყობა”, – განაცხადა დედაქალაქის მერმა კახა კალაძემ.
