საქართველოს ფინანსთა მინისტრის მოადგილე, გიორგი კაკაურიძე აცხადებს, რომ 2019 წლის 1-ლი იანვრიდან საქართველოში პენსია გაიზრდება.
როგორც ჟურნალისტებს კაკაურიძემ განუცხადა, მომავალი წლიდან როგორც ასაკობრივი პენსია, ასევე მნიშვნელოვნად და მკვეთრად გამოხატული შეზღუდული შესაძლებლობების მქონე პირთა პენსია გაიზრდება.
მისი თქმით, ასევე გაიზრდება 0-დან 18 წლამდე შეზღუდული შესაძლებლობების მქონე ბავშვების პენსიაც.
„ბიუჯეტის კანონით პენსია განისაზღვრება, სხვა დანარჩენი – მთავრობის დადგენილებით. როგორც კი ბიუჯეტი დამტკიცდება, მთავრობა შესაბამის გადაწყვეტილებას მიიღებს“, – განაცხადა კაკაურიძემ.
საპარლამენტო კომიტეტებში 2019 წლის სახელმწიფო ბიუჯეტის პროექტზე მსჯელობენ. საკანონმდებლო ორგანო დოკუმენტს დეკემბრის ბოლომდე დაამტკიცებს, თუმცა მანამდე მთავრობა ბიუჯეტის პროექტის კორექტირებას მოახდენს.