ახალი სტარტაპები ჩვენი ქვეყნის განვითარების საწინდარია, – ამის შესახებ ეკონომიკისა და მდგრადი განვითარების მინისტრმა, გიორგი ქობულიამ განაცხადა, რომელმაც მონაწილეობა მიიღო „თიბისი ბანკის“ მიერ ორგანიზებული ბიზნესდაჯილდოების ცერემონიაში.
მინისტრმა ნომინაციაში “წლის ქართული პროდუქტი” გამარჯვებული კომპანიის “გეფერინის” წარმომადგენელს ჯილდო გადასცა. აღსანიშნავია, რომ აღნიშნული კომპანიის გარდა, ნომინანტები ასევე იყვნენ აგროკომპანია “ჰერბია” და სამედინიციო პრეპარატების მწარმოებელი კომპანია “ნეოფარმი”.
მისასალმებელ სიტყვაში, ეკონომიკისა და მდგრადი განვითარების მინისტრმა მადლობა გადაუხადა ბიზნესდაჯილდოების ორგანიზატორებს საქართველოში ბიზნესსექტორის წახალისებისა და მათი საქმიანობის დაფასებისთვის.
„მნიშვნელოვანია, რომ მეტი მსგავსი ღონისძიება გაიმართოს, ამიტომ მივესალმებით ასეთ ღონისძიებებს, რომელიც მოტივაციას აძლევს მცირე და საშუალო ბიზნესს იმისთვის, რომ კიდევ მეტი გააკეთონ. ჩვენ, როგორც მთავრობა, ძალიან დიდი ყურადღებით და ძალიან დიდი გულისხმიერებით გიყურებთ ყველას და ჩვენ გვინდა თქვენი წარმატება იმიტომ, რომ გვერწმუნეთ, თქვენი წარმატება არის ჩვენი ქვეყნის წარმატება”, – მიმართა ეკონომიკისა და მდგრადი განვითარების მინისტრმა ბიზნესდაჯილდოებაზე შეკრებილი საქმიანი სექტორის წარმომადგენლებს.
გიორგი ქობულიამ ასევე ყურადღება გაამახვილა მცირე და საშუალო ბიზნესზე და განსაკუთრებული აქცენტი სტარტაპებისა და ახალი კომპანიების განვითარების მნიშვნელობაზე გააკეთა.
“ჩვენთვის კერძო სექტორში მცირე და საშუალო ბიზნესი არის რეალურად ძალიან მნიშვნელოვანი. ის ახალი სტარტაპები, ახალი განვითარება, რომელსაც ვხედავთ, ჩვენი ეკონომიკისა და ჩვენი ქვეყნის განვითარების წარმატების საწინდარია,” – აღნიშნა მინისტრმა.
მან ასევე ყურადღება გაამახვილა ეკონომიკის სამ სექტორზე – სოფლის მეურნეობაზე, ფარმაციასა და ტყავეული ნაწარმის წარმოებაზე, რომელთა განვითარებაც ქვეყნის მთავრობის ეკონომიკური პოლიტიკის პრიორიტეტული მიმართულებებია.
„თიბისი ბანკის“ ბიზნესდაჯილდოებაზე ჟიურიმ 18 ფინალისტიდან 6 გამარჯვებული კომპანია შემდეგ ნომინაციებში გამოავლინა: წლის ბიზნესი, წლის ქართული პროდუქტი, წლის სტარტაპი, წლის ტურისტული ბიზნესი, წლის ქალი მეწარმე და ბიზნესი დადებითი გავლენისთვის.
ბიზნესდაჯილდოების პარტნიორები იყვნენ: ევროპული ფონდი სამხრეთ-აღმოსავლეთ ევროპისთვის (EFSE), ევროპის რეკონსტრუქციისა და განვითარების ბანკი (EBRD), “Impact Hub Tbilisi” და ეკონომიკისა და მდგრადი განვითარების სამინისტროს სააგენტო „აწარმოე საქართველოში“.